औद्योगिक क्षेत्रभन्दा कृषि क्षेत्रलाई प्रोत्साहनः डेपुटी गभर्नर

म्याग्दी, मंसिर २५ । नेपाल राष्ट्र बैँकका डेपुटी गभर्नर चिन्तामणि शिवाकोटीले मुलुकको समृद्धिका लागि कृषि कर्जालाई प्रोत्साहन गरिएको बताएको छ ।

नेपाल बैँक लिमिटेड म्याग्दी शाखाद्वारा आज सदरमुकाम बेनीमा आयोजित पत्रकार सम्मेलनमा उनले भने– ‘कृषि क्षेत्रमा लाग्नेलाई प्रोत्साहन गर्न कृषि र विपन्न वर्ग कर्जालाई सरलीकरण गर्ने अभियानमा राष्ट्र बैँक लागिपरेको छ ।

डेपुटी गभर्नर शिवाकोटीले नेपालमा औद्योगिक क्षेत्रभन्दा कृषि क्षेत्र बढी सम्भावनायुक्त देखिएकाले यस क्षेत्रको विकासका लागि कृषि कर्जा ल्याइएको उल्लेख गर्दै बैँकहरुलाई कूल लगानीको १५ प्रतिशत जलविद्युत र कृषिमा कर्जा प्रवाह गर्नुपर्ने बाध्यकारी व्यवस्था बनाएको बताए ।

‘कृषि क्षेत्रको व्यवसायीकरण गर्न सस्तो ब्याजदरमा कृषि र विपन्न कर्जा दिने गरिएको र यसमा हरेकवर्ष लगानी बढाउने नीति ल्याइएको छ’ उनले भने– ‘अहिले रु १ करोडसम्मको कर्जालाई मात्रै कृषि कर्जा मान्ने गरिएकोेमा त्यसको सिमितता हटाउन राष्ट्र बैँकले कार्यविधि संशोधन गर्न लागिएको छ ।’

एक फरक प्रसङ्गमा उनले भारतले पाँच सय र एक हजार दरका भारतीय रुपैयाँमा लगाएको प्रतिबन्धले नेपालको वित्तीय क्षेत्र पनि प्रभावित बनेको बताउँदै नेपालमा रहेका उक्त भारतीय रुपैयाँलाई व्यवस्थापनका लागि एक व्यक्तिले पच्चीस हजारसम्म सटही गर्न पाउने व्यवस्था गर्न पहल गरिरहेको जानकारी दिए ।

कमेन्ट गर्नुहोस्