भियाग्राका फाइदा; तालेबानलाई हराउने देखि बाघ संरक्षणसम्म

आजभन्दा ठीक २० वर्ष अगाडि २७ मार्च १९९८ का दिन औषधि निर्माता कम्पनी फाइजरले सिडेनाफिल सिट्रेट भन्ने रासायनिक नाम भएको तनाव कम गर्ने औषधि बजारमा ल्याउन अनुमति पायो । तर यस औषधिले मानिसहरूको सामान्य तनाव हैन अर्कै तनाव पो भागाइदियो ।

यो औषधिको व्यवसायिक नाम थियो ‘भियाग्रा’ । भियाग्रा हलुका बैगानी रंगको सानो गोली, तर यसले कतिपय यस्ता काम गरेको छ जुन अमेरिकी सेनाले समेत गर्न सकेको थिएन ।

हो, भियाग्राले अमेरिकी सेनाका लागि साह्रै कठिन हुनसक्ने एउटा काम गरेको थियो । त्यो थियो तालेबान विद्रोहीहरूबारे गोप्य सूचना संकलन । यही त्यो कारण थियो जसले अमेरिकी सेनालाई तालेबान विद्रोहीहरूलाई हराउन मद्दत पुगेको थियो ।

कसरी गऱ्यो त भियाग्राले अमेरिकाको सहायता ?

अमेरिकाले तालेबान विद्रोहीहरूका गोप्य ठिकानाहरू पत्ता लगाउन यसको प्रयोग गरेको खुल्न आएको छ । सिआइएले तलेबन सम्बद्ध गोप्य सूचनाहरूको सट्टामा अफगान कबिलाका प्रमुखहरूलाई घुस स्वरूप भियाग्रा दिने गरेको बुझिएको छ ।

अफगान कबिलाहरूका प्रमुखहरूका धेरै श्रीमतीहरू हुने गरेको र उमेरले पाको हुँदै गएपछि तुलनात्मक रूपमा कलिलो उमेरक श्रीमतीहरूलाई सन्तुष्ट पार्न धेरै जसो कबिला प्रमुखहरू भियाग्राको ताकमा रहने गरेको तथ्य खुल्न आएको छ । सिआइएले हालै सार्वजनिक गरेको जानकारीमा सित्तैमा भियाग्रा पाएपछि कबिला प्रमुखहरू खुसी हुने र उनले जानकारीहरू दिने गरेको बताइएको छ ।

अरु पनि छन् रोचक तथ्य

भियाग्राका अरू पनि रोचक फाइदाहरू देखिएका छन् जुन सामान्यतया त्यति महत्वपूर्ण लाग्दैनन्। किनभने यी फाइदाहरू उसका सामान्य रासायनिक फाइदा भन्दा पृथक छन् । तर फाइदा त फाइदा नै हुन् । हेरौं के रहेछन् यसका अरू फाइदा:

सबैभन्दा बढी नक्कली औषधि

संसारकै सबैभन्दा बढी नक्कली बनाइने भियाग्राकै नामबाट बनाइन्छ । सक्कली भियग्राको एउटा पत्तामा मात्र चार गोलीहरू हुने गर्दछन् र यसको आकार पनि हीरा जस्तै हुने गरेको छ ।

फूलहरू ताजा राखिराख्न

थोरै मात्रामा भियाग्रा घोलेर गमलामा फूलदानीमा राखेमा फूलहरू लामो समयसम्म ताजा रहने र डाँठ पनि नलत्रने हुन्छ ।

बाघ र गैंडाको संरक्षण

उहिले मानिसहरू यौन शक्तिवर्धकका रूपमा बाघको हाडहरु र गैंडाको खाग आदि प्रायो गर्ने गर्थे । भियाग्रा आएपछि बाघ र गैंडाहरूको पनि संरक्षण भएको छ ।

गर्दैन मष्तिष्कलाई हानि

कतिपय मान्छेले भियाग्राले मष्तिष्कमा असर गर्छ भनेर ठान्छन् । तर यो भ्रम मात्र रहेको चिकित्सकहरू बताउँछन् । यसले मष्तिष्क र हर्मोनमा कुनै असर नगर्ने र यसले रक्त प्रवाह मात्र बढाउने भनिएको छ । साथै यो मानसिक निराशाको औषधि नरहेको र बजारमा महिलाको लागि कुनै भियाग्रा (फिमेल भियाग्रा) उपलब्ध नरहेको समेत हिकित्सकहरू बताउँछन् ।

मधुमेह र क्यान्सरमा यस्तो छ असर

भियाग्राले ८० प्रतिशत मानिसमा मात्रै असर देखाउँछ । मधुमेह रोगीहरूमा यसको असर त्यति नहुने बताइएको । त्यस्तै केही प्रारम्भिक शोधहरूले क्यान्सरको उपचारमा समेत भियाग्राको प्रयोग गर्न सकिने देखाएको छ ।

 

कमेन्ट गर्नुहोस्

error: Content is protected !!