चकलेट सडकमा छताछुल्ल हुँदा पोल्याण्डमा राजमार्ग नै अवरुद्ध; भिडियो सहित

१२ हजार किलो चकलेट सडकमा पोखिएर अवरुद्ध छ एउटा प्रमुख राजमार्ग

सडकमा छताछुल्ल पोखिएको चकलेट व्यवस्थापन गर्न राजमार्ग नै बन्द गर्नुपर्ने स्थिति आयो भन्दा अचम्म लाग्न सक्छ तर पोल्याण्डमा यस्तै भएको छ  । बर्लिनदेखि वार्सा जाने ए-२ राजमार्गमा १२ टन तरल चकलेट बोकेको एउटा ट्यांकर डिभाइडरमा ठोक्किएर पल्टिएपछि चकलेट सडकमा फैलिएको थियो  ।

उक्त चकलेट बगेर पुरै राजमार्गमा फैलिएपछि छ लेनको उक्त सडक पूर्ण रूपमा बन्द गर्नु परेको छ  ।

प्रहरीका अनुसार उक्त ट्यांकर एउटा टफी कम्पनीको रहेको थियो  । घट्नाबाट यातायात पूर्ण रूपमा बाधित भएपनि कुनै पनि प्रकारको मानवीय क्षति भने हुन पाएको छैन  ।

राजमार्गमा चकलेट हिलो झैं टाँसिएको छ र यसलाई सफा गर्न धेरै कठिन भइरहेको बताइएको छ  ।

एक जना दमकलकर्मीका अनुसार सडकबाट चकलेट सफा गर्नु तेल या हिउँ सफा गर्नुभन्दा अप्ठ्यारो रहेको छ  ।

सामान्यतयाः तेललाई सफा गर्न पानी र बालुवाको सहायता लिइने र हिउँको हकमा भने मसीनको प्रयोग गरिने गरिन्छ  ।

तर गाढा र लेसिलो तरल चकलेट सफा गर्न भने त्यति सजिलो छैन  । यसका निम्ति लाखौं लिटर उम्लिरहेको पानीको आवश्यकता पर्नेछ र यदि चकलेट ठोस भइदिएको खण्डमा यसले जटिलताहरू झनै बढादिने छ  ।

पोल्याण्डको एउटा समाचार च्यानलसँग कुरा गर्दै दमकल अधिकारी बोग्दान कोभाल्सकीले भने, “यसलाई सफा गर्न धेरै समय लाग्ने देखिन्छ  । यदि चकलेट साह्रो भयो भने त यसलाई हटाउन हिउँका पत्रहरू हटाए भन्दा पनि गाह्रो हुनेछ  ।

दमकल विभागले जनाए अनुसार उक्त १२ किलोग्राम चकलेटको पाँच सेन्टिमिटर बाक्लो पत्र बिस्तारै कडा हुँदैछ  । यस घट्नालाई दमकलकर्मीहरूले समेत रमाइलोको रूपमा लिएका छन्  ।

कोभाल्सकी भन्छन्,”पुरै चकलेट एउटा ठुलो चकलेट बारमा बदलिँदै छ  ।” स्थानिय्हरूका अनुसार घट्नास्थलभन्दा कयौं किलोमिटर टाढासम्म चकलेटको गन्ध फैलिएको छ  ।

यस घट्नाबारे सामाजिक संजालमा भिडियोहरू सार्वजनिक भएका छन् ।

हेर्नुस् एउटा भिडियो:

 

कमेन्ट गर्नुहोस्