फ्रान्स १२ वर्षपछि विश्वकपको फाइनलमा, उपाधि जित्ने सम्भावना कति ?

मस्को । रसियामा जारी विश्वकप फुटबलमा फ्रान्स १२ वर्षपछि फाइनलमा प्रवेश गरेको छ । गएराती भएको खेलमा बेल्जियमलाई १-० ले हराउँदै फ्रान्स तेस्रो पटक विश्वकपको फाइनलमा प्रवेश गरेको हो । यो भन्दा पहिले उ १९९८ र २००६ मा फाइनल पुग्न सफल भएको थियो । यस्तै, फ्रान्सले १९९८ को विश्वकप जितेको थियो ।

फ्रान्सले उपाधिका लागि क्रोएसिया र इंग्ल्यान्डबीच हुने खेलको विजेतासँग आइतबार प्रतिस्पर्धा गर्नेछ। खेलको ५१ मिनेटमा फ्रान्सले अग्रता लियो। कर्नर बलमा डिफेन्डर स्यामुयल उम्टिटीले हेडमार्फत गोल गरेर फ्रान्सलाई अग्रता दिलाए। राफायल भारनको कर्नर बलमा उम्टिटीले गोल गरेका हुन्।

विश्वकपको सेमिफाइनलमा फ्रान्सका लागि गोल गर्ने उम्टिटी तेस्रा डिफेन्डर बने। फ्रान्सले विश्वकपको सेमिफाइनलमा गरेका ६ मध्ये ४ गोल डिफेन्डरबाट भए। यसअघि सन् १९८२ मा जर्मनी विरुद्धको सेमिफाइनलमा डिफेन्डर मारियउस ट्रेसोरले फ्रान्सका लागि गोल गरेका थिए। सन् १९९८ को क्रोएसिया विरुद्धको सेमिफाइनलमा फ्रान्सका डिफेन्डर लिलियन थुरामले २ गोल गरेका थिए। 

त्यसअघि पहिलो हाफमा दुवै टिमले गोलका लागि गरेका प्रयासमा विपक्षी गोलकिपर बाधक बनेका थिए। बेल्जियमका इडिन हजार्ड र टोबी एन्डरवारेल्डको प्रहारलाई फ्रान्सका गोलकिपर हुगो लोरिसले बिफल पारेका थिए। यस्तै फ्रान्सका बेन्जामिन पभार्डको उत्कृष्ट प्रहारमा बेल्जियमका गोलकिपर थिबाउन कोउटिउसले उत्कृष्ट बचाउ गरेका थिए।
-एजेन्सी

कमेन्ट गर्नुहोस्