खेलाडीको संस्कारबाट राजनीतिकर्मीले पाठ सिक्नुपर्ने- मुख्यमन्त्री शंकर पोखरेल

रुपन्देही, फागुन १ । प्रदेश नं ५ का मुख्यमन्त्री शङ्कर पोखरेलले शहीदहरुको बलिदानीका कारण मुलुकले समृद्धि र विकासले गति लिएको बताएका छन् । जनयुद्धको २४ औँ वार्षिकोत्सवको अवसर पारेर आजदेखि बुटवलमा शुरु शहीद स्मृति कप खुला नकआउट फुटबल प्रतियोगिताको उद्घाटन समारोहमा उनले शहीदको बलिदानीको परिणामस्वरुप नै मुलुकमा राजनीतिक परिवर्तन सम्भव भएको धारणा राखे ।

उनले आजकै दिनमा प्रधानमन्त्री रोजगार कार्यक्रम घोषणा भएको स्मरण गर्दै अबका दिनमा कसैले पनि रोजगारीको हकबाट वञ्चित हुनु नपर्ने उल्लेख गरे । मुख्यमन्त्री पोखरेलले भने, “आजको दिन ऐतिहासिक दिन हो, यो दिन युवाका लागि कोशेढुङ्गा सावित हुनेछ ।”

परिणामलाई सहजै स्वीकार गर्ने खेलाडीको संस्कारबाट राजनीतिक नेतृत्वले पाठ सिक्नुपर्ने भन्दै उनले यसले राजनीतिक संस्कृतिलाई व्यवस्थित गर्ने बताए ।

कार्यक्रममा शहीद परिवारलाई सम्मान गरिएको थियो । शहीद स्मृति खेलकूद क्लबको आयोजना र मदन भण्डारी स्पोटर्स एकेडेमीको सहकार्यमा आयोजना गरिएको प्रतियोगितमा १० समूहको सहभागिता रहेको क्लबका अध्यक्ष योगेन्द्र गौतमले जानकारी दिए ।

प्रतियोगिताको उपाधि विजेताले नगद रु एक लाख एक हजार, मेडल, कप, प्रमाणपत्र तथा उपविजेतालाई नगद रु ५० हजार ५०० सहित पदक र प्रमाणपत्र प्राप्त गर्नेछन् ।  रासस

 

कमेन्ट गर्नुहोस्

error: Content is protected !!