४२ जिल्लामा ३ हजार ४२५ मा डेंगु देखियो, नियन्त्रण गर्न आर्थिक संकट

काठमाडौंः  स्वास्थ्य तथा जनसङ्ख्या मन्त्रालयलाई डेंगु रोग नियन्त्रण गर्न आर्थिक सङ्कट देखा परेको छ । आव २०७५/७६ को हालसम्म ३ हजार ४२५ मा रोग देखा परिसकेको छ । तीमध्ये ३ हजार जना सुनसरी जिल्लाका मात्र रहेका छन् ।

सङ्घीयता कार्यान्वयनसँगै किटजन्य रोग नियन्त्रण तथा रोकथाममा समन्वय गर्दै आएको इपिडिमियोलोजी तथा रोग नियन्त्रण महाशाखाका अनुसार ‘लामखुट्टे खोज र नष्ट गर’ थप कार्यक्रम कार्यान्वयनमा मन्त्रालयलाई आर्थिक सङ्कट देखिएको हो। गत वर्ष महाशाखाले प्रदेश तहमा रु छ करोड १७ लाख, विभिन्न स्थानीय तहमा रु एक करोड ६६ लाख र महाशाखाले रु एक करोड ७१ विनियोजन गरेको थियो।

यस वर्ष उक्त क्षेत्रमा खासै रकम वृद्धि नभएको बताइएको छ। महाशाखाका निर्देशक चिकित्सक विवेककुमार लालले भने, “डेंगु रोग नियन्त्रण गर्न थप रकम, जनशक्ति तथा किटबक्स चाहियो भनेर सामाजिक विकास मन्त्रालय र स्थानीय तहबाट पत्र आउँछ। समायोजनका कारण महाशाखामा थप जनशक्ति छैन। किटबक्स पठाइ सकियो। ती निकायलाई थप पैसा कहाँबाट दिनु? अर्थमन्त्रालयलाई भन्यो भने बजेटको सिलिङ् त्यति हो भन्दछ।”

उनले कार्यक्रमका लागि के कति रकम अपुग भएको हो कुनै जानकारी दिएन। एडिस एजिप्टाई जातको पोथी लामखुट्टेको टोकाइबाट लाग्ने डेंगु रोग पछिल्लो समय नेपालमा अनियन्त्रित रुपमा बढ्दैछ। चितवनमा सन् २००४ मा पहिलो पटक देखा परेका डेंगु मनाङ, मुस्ताङ, जुम्लालगायतका केही हिमाली जिल्लामा मात्र देखा परेको छैन। महाशाखा प्रमुख डा लालले हिमाली केही जिल्लाबाहेक अधिकांश जिल्लामा डेंगु देखा परिसकेको जानकारी दिँदै सहरी क्षेत्र उच्च जोखिममा रहेका बताए।

महाशाखाद्वारा डेंगु नियन्त्रणका प्रयासका बारेमा जानकारी दिन आइतबार आयोजित पत्रकार सम्मेलनमा उनले डेंगु नियन्त्रण गर्न आर्थिक अभाव रहेको गुनासो गर्दै डेंगुका बारे सचेतना बढाउन आवश्यक रहेकामा जोड दिए। उक्त जातको लामखुट्टेले विशेष गरी दिउँसो मात्र टोक्दछ। यो रोग मानिसबाट मानिसमा सर्दैन। खासगरी उक्त जातको लामखुट्टे सफा पानी जमेको ससाना स्थानमा फुल पार्ने गर्दछ। वर्षात्को महीनासँगै पानी जम्न थालेपछि रोगको प्रकोप हुने महाशाखाले जनाएको छ।

डेंगुको लक्षण
महाशाखाका निर्देशक डा लालका अनुसार एक्कासी ज्वरो आउनु, ज्वरो पाँच सातदिनसम्म रहनु, आँखाको गेडी तथा टाउकोको पछिल्लो भाग धेरै दुख्नु, शरीर कट्कटी दुख्नु लगायतका लक्षण देखन्छन्। यसबाट जोगिन मुख्य उपाय नै वातावरणीय सरसफाइ हो। साथै लामखुट्टेको टोकाइबाट बच्न आफू बस्ने वरपर पानी जम्न नदिनु र झुल टागेर सुत्नु रहेको छ।

कमेन्ट गर्नुहोस्

error: Content is protected !!