विद्युत् प्राधिकरणको नाफा १४९ प्रतिशतले बढ्यो

काठमाडौं । नेपाल विद्युत् प्राधिकरणले एक वर्षमा १४९ प्रतिशतले नाफा वृद्धि गरेको छ । प्राधिकरणले आर्थिक वर्ष २०७५–०७६ मा अघिल्लो आवको तुलनामा २ अर्ब ९० करोडले नाफामा वृद्धि गर्दै ६ अर्ब २० करोड नाफा कमाएको छ ।

२०७३ भदौमा कुलमान घिसिङ कार्यकारी निर्देशकमा रूपमा प्राधिकरणमा प्रवेश गर्दा प्राधिकरण वार्षिक ८ अर्ब ८९ करोड घाटामा थियो । घिसिङ नेतृत्वमा आएपछि प्राधिकरण लगातार तेस्रो वर्षसम्म नाफामा रहँदै आएको छ । यो प्राधिकरणका लागि ऐतिहासिक सफलता रहेको प्राधिकरणका प्रवक्ता प्रवल अधिकारीले बताए ।

तीन वर्षको समयमा प्राधिकरणले १० प्रतिशतभन्दा बढी विद्युत् चुहावट नियन्त्रण गर्नु ठूलो उपलब्धि हो । हाल विद्युत् चुहावट १५ दशमलव ३२ प्रतिशत रहेको छ । यो भनेको प्राधिकरणलाई १२ अर्बबराबर घाटा हो र नियन्त्रणका आधारमा हेर्ने हो भने हामीले तीन वर्षमा १० दशमलव ६४ प्रतिशत नियन्त्रण गर्दा प्राधिकरणलाई करिब ८ अर्ब नाफा भएको अधिकारीले बताए । उनले भने– अब १५ प्रतिशतको चुहावटबाट तल झार्नु प्राधिकरणका लागि ठूलो चुनौती हो ।

याे पनि पढ्नुस  कुलमानको कमालः एकै वर्ष प्राधिकरणले कमायो ७ अर्ब २० करोड

नियन्त्रणकै कुरा गर्ने हो भने ८ देखि ९ प्रतिशतसम्म झार्न सक्ने अवस्था छ । तर, यसका लागि भने प्राधिकरणले प्राविधिक क्षेत्रमा ठूलो लगानी गर्नुपर्ने देखिन्छ । यद्यपि प्राधिकरणले भने यसै चुहावटलाई समेत कायम राख्न सतर्क हुँदै आगामी वर्षसम्म १० देखि १२ प्रतिशतसम्म झार्ने लक्ष्य लिएको प्रवक्ता अधिकारीले बताए । प्राधिकरणको तथ्यांकअनुसार आर्थिक वर्ष २०७२–०७३ मा २५ दशमलव ७८ प्रतिशत विद्युत् चुहावट रहेको थियो । यसलाई नियन्त्रण गर्दै तीन वर्षको समयावधिमा १० दशमलव ६४ प्रतिशतले नियन्त्रण गरेर गत आर्थिक वर्षमा १५ दशमलव ३२ प्रतिशत कायम गरेको छ। चुहावट नियन्त्रणबाट मात्रै प्राधिकरणले गत आवमा करिब ३ अर्ब ६० करोड रुपैयाँ आम्दानी गरेको छ।

गत आवमा ग्रिडमा आबद्ध भई विद्युत् उपभोग गर्ने जनसंख्या ७८ प्रतिशत पुगेको छ । यो अघिल्लो आर्थिक वर्षको तुलनामा १० प्रतिशतले वृद्धि भएर राष्ट्रिय र सामुदायिक गरी ४५ लाख घरधुरसम्ममा विद्युतीय पहुँच विस्तार भएको प्रवक्ता अधिकारीले बताए । उनले भने यो तथ्यांक राष्ट्रिय प्रसारण प्रणालीको विद्युतीय पहुँच पुगेको क्षेत्र मात्रै हो । यसबाहेक दुर्गम क्षेत्रका करिब १८ प्रतिशत जनताले नवीकरणीय ऊर्जाका स्रोतको उपयोग गरेर विद्युत् सेवा लिइरहेको अधिकारीले बताए।

याे पनि पढ्नुस  प्राधिकरणलाई एक नम्बरको संस्था बनाउने मन्त्री पुनको दाबी

गत आवको प्राधिकरणलाई उपलब्धि भएको कुल ७ अर्ब ५५ करोड युनिटमध्ये प्राधिकरणले २ अर्ब ५५ करोड युनिट उत्पादन गर्दा निजी उत्पादकबाट २ अर्ब १९ करोड युनिट र आयात २ अर्ब ८१ करोड युनिट रहेको छ । यस आवधिमा प्राधिकरणले ३ करोड ४७ लाख युनिट अर्थात् ३२ करोड रुपैयाँको विद्युत निर्यात गरेकोे छ । प्राधिकरणका प्रवक्ता अधिकारीले ३२ करोडबराबर विद्युत् निर्यात गर्नु भनेको नेपालले आत्मनिर्भरताको यात्रा तय गर्नु हो । उनले भने, ‘हामीले आत्मनिर्भरताको यात्रा तय गरिसकेका छौं । अब चाँडै विद्युत् निर्यात गर्ने देशको सूचीका रहने छौं ।’ गतवर्ष प्राधिकरणले निजी उत्पादकबाट १४ अर्ब १३ करोड रुपैयाँ र २३ अर्ब ३ करोड रुपैयाँको विद्युत् आयात गरेको छ ।

याे पनि पढ्नुस  प्राधिकरणलाई एक नम्बरको संस्था बनाउने मन्त्री पुनको दाबी

त्यस्तै, प्राधिकरणले प्रसारण लाइनतर्फ ७५७ सर्किट किलोमिटर लाइन निमार्ण सम्पन्न गरेर ६०६ सर्किट किलोमिटर चार्ज गरेको जनाएको छ । वितरण तथा प्रसारण गरी जम्मा ४० वटा सबस्टेसन नयाँ विस्तार तथा स्तरोन्नति गरी करिब ९२० एमभीए क्षमतमा थप भएको छ भने वितरण ट्रान्सफरर्मर ६५८१ वटा थप गरेर करिब ६६० एमभीए क्षमता वितरण प्रणालीमा थप गरिएको हो ।

लामो समयदेखि सम्पन्न हुन नसकेका रुग्ण आयोजना मध्ये ६० मेगावटको माथिल्लो त्रिशूली, काबेली कोरिडोरलगायतका उत्पादनतर्फ एक, प्रसारणतर्फ तीन र वितरणतर्फ ३४ गरी जम्मा ३८ वटा रुग्ण आयोजना सम्पन्न गरेको छ । यस अवधिमा १३ वटा आयोजनाको ठेक्का सम्झौता रद्द गरी नयाँ ठेक्का सम्झौता गरिएको प्राधिकरणले जनाएको छ ।

विद्युत् चुहावट नियन्त्रण र विद्युत् खपत बढेर आम्दानीमा सुधार गरेको प्राधिकरणले गत आर्थिक वर्षमा विगतका वर्षको ब्याज, रोयल्टी गरी सरकारी ढुकुटीमा जम्मा १५ अर्ब ५९ जम्मा गरेको समेत जनाएको छ ।

कमेन्ट गर्नुहोस्

error: Content is protected !!