प्रधानमन्त्री प्रचण्डले भने – स्थानीय निर्वाचनको ढोका खुल्यो

भरतपुर, पुस २६ । प्रधानमन्त्री पुष्पकमल दाहाल ‘प्रचण्ड’ले संसदको गतिरोध अन्त्यसँगै स्थानीय निर्वाचनको ढोका खुलेको बताएका छन् । सोमबार बिहान पूर्वी चितवनको बीरेन्द्रनगरमा जनयुद्धका शहिद तथा बेपत्ता योद्धाहरुको स्तम्भको अनावरण गर्दै प्रधानमन्त्रीले उक्त कुरा बताएका हुन् ।

स्तम्भ अनावरण गर्दै प्रधानमन्त्रीले भने–‘संसदको गतिरोध अन्त्य भएको छ । हामीले असहमतिका बीच प्रक्रियामा सहमति खोजेका छौं । संसदबाट निर्वाचन सम्बन्धि विद्येयक अघि बढिसकेका छन्, अब स्थानीय निर्वाचनको ढोका खुल्यो, बैशाखमा निर्वाचन गर्ने गरी सरकारले छिटै स्थानीय निर्वाचनको मिति घोषणा गर्दैछ ।’

याे पनि पढ्नुस  प्रधानमन्त्री र मधेसी मोर्चाबीचको छलफल सकियो, के भयो बैठकमा?

कार्यक्रममा प्रधानमन्त्रीले राजनीतिक निकासका साथै आर्थिक समृद्धिमा आफ्नो ध्यान गएको बताउँदै भने–‘राजनीतिक स्थिरताले मात्रै विकासका काममा तिब्रता पाउन सक्छ । तर, राजनीतिक विवादका कारण विकास निर्माण र आर्थिक समृद्धिको खाका प्रभावित हुनु हुँदैन । मैले देशव्यापी रुपमा ठूला आयोजनाहरुको निरीक्षण र अनुगमन गरिरहेको छु । विकास र समृद्धिलाई केन्द्रमा राखेर देश दौडाहामा छु । अब कुनै पनि बहानामा विकासका काममा अवरोध गर्नु हुँदैन ।’

याे पनि पढ्नुस  नेपाल इन्डोनेसियासँग सहकार्य गर्न इन्छुकः प्रधानमन्त्री

चितवनको राजनीति र विकासबारे बोल्दै प्रधानमन्त्रीले भने–‘चितवन आफैमा पनि राजनीतिक र सामाजिक आन्दोलन र जागरणको केन्द्र हो । हिजो परिवर्तनको आन्दोलनमा महत्वपूर्ण भूमिका खेलेको चितवनले अब विकास र समृद्धिको नेतृत्व गर्नुपर्छ । मैले छिटै चितवनको विकासको प्याकेज अगाडि सार्नेछु । त्यसमा तपाईहरुको सकारात्मक सहयोग र ऐक्यवद्धताको अपेक्षा गरेको छु ।’

याे पनि पढ्नुस  मधेसी मोर्चा फकाउँदै प्रधानमन्त्री

स्तम्भ अनावरण कार्यक्रममा माओवादी केन्द्रका नेताहरु अमिक शेरचन, जोखबहादुर महरा, सूर्य सुवेदी लगायतको उपस्थिति थियो । कार्यक्रमपूर्व प्रधानमन्त्रीले भरतपुर बिमानस्थलमा पत्रकारहरुसँग संक्षिप्त कुराकानी गरेका थिए ।

कमेन्ट गर्नुहोस्