अलैँचीको बिरुवा बन्यो राम्रो आम्दानीको स्रोत

काभ्रे, पुस २९। कुनै समयमा विदेश जाने तयारीमा रहेका कुसादेवीका दीपेन्द्र थापा हाल अलैँचीको बिरुवा उत्पादन गरी मनग्य आम्दानी गर्दै आएका छन् ।

तीन वर्षदेखि अलैँचीको बिरुवा उत्पादन गर्दै आएका थापाले बिरुवा बिक्रीबाट वार्षिक रु २० लाखसम्म आम्दानी गर्दै आएका छन् । सुरुवाती चरणमा बिरुवा उत्पादन गर्न निकै मिहेनत गर्नुपर्ने भएपनि यथेष्ट आम्दानी हुन थालेपछि भने काम गर्न जाँगर चल्ने गरेको उनी बताउँछन् ।

रु एक लाखको लगानीमा दुई रोपनी जग्गामा अलैँचीको बिरुवा उत्पादन कार्य गरी सुरु गरेको यो व्यवसाय हाल आठ रोपनी जग्गामा बिरुवा उत्पादन गर्दै आएका छन् । थापाले कृषिसम्बन्धी विभिन्न तालिम समेत लिएपछि बिरुवा उत्पादन गर्न थालेको बताउँछन् ।

“बिरुवा बिक्री गर्न बजारसम्म धाउनु पर्दैन,” उनले भने । सर्वसाधारण बिरुवा लिन घरसम्मै आइपुग्छन् । “आफ्नै देशमा नै गर्न चाहे के हुँदैन, विदेशमा भन्दा दोब्बर आम्दानी गर्न सकिन्छ,” उनले भने ।

अलैँचीको बिरुवा उत्पादनबाटै उनले आठजनाको परिवार धान्दै आएका छन् । आफूले अलैँचीको बिरुवा उत्पादनको काम गर्न थालेपछि गाउँका अन्यलाई प्रशिक्षण दिएर सामूहिक बीउ उत्पादनमा जोड दिँदै आएका छन् ।

अलैँचीको एउटा बिरुवाको मूल्य रु १० सम्म पर्छ । एउटा झाङ बिरुवालाई रु २०० सम्म पर्छ । एक किलो अलैँचीको गेडाबाट रु दुई लाखसम्मको बिरुवा उत्पादन हुने थापाको भनाइ छ ।
हाल थापाले उत्पादन गरेका बिरुवाहरु काभ्रेपलोञ्चोक, सिन्धुपाल्चोक, कास्की, मकवानपुरलगायत देशका अन्य जिल्लामा समेत बिक्री वितरण हुने गरेको छ । हाल उनले नर्सरी उद्योग सञ्चालन गर्दै आएका छन् ।

कमेन्ट गर्नुहोस्

%d bloggers like this: