उर्जा समिटमा भाग लिन प्रधानमन्त्री युएई प्रस्थान गर्दै, नेपाली श्रमिकको समस्याका लागि उच्चस्तरीय छलफल हुने (पूर्ण कार्यक्रमसहित)

काठमाडौं, माघ १ । उर्जासँग सम्बन्धित अन्तर्राष्ट्रिय सम्मेलनमा भाग लिन तथा नेपाली श्रमिकहरुको समस्याबारे सम्बन्धित देशका प्रमुखहरुसँग छलफल गर्न प्रधानमन्त्री प्रचण्ड आजदेखि ३ दिने भ्रमणमा खाडी मुलुकतर्फ प्रस्थान गर्दैन् ।

खाडी मुलुक भ्रमणमा प्रधानमन्त्री यसै साता “भविष्यमा उर्जा” विषयमा आयोजना हुने विश्व समिटमा भाग लिन प्रधानमन्त्री आज अपरान्ह खाडी मुलुकको आबुधाबी पुग्ने कार्यक्रम छ ।

प्रधानमन्त्री सचिवालयले दिएको जानकारी अनुसार, प्रधानमन्त्रीले भोली माघ २ गते संयुक्त अरब इमिरेट्सका उपराष्ट्रपति तथा प्रधानमन्त्री शेख मोहम्मद बिन रशिन अल माक्तौमसँग भेटघाट गर्ने छन् । साँझ ७ बजे दुबईमा हुने भेटका अवसरमा प्रधानमन्त्रीले नेपाल तथा युएइबीच व्यापार र लगानीका क्षेत्रमा थप सम्बन्ध सुधार गर्न तथा नेपाली श्रमिकहरुका समस्याका बारेमा छलफल गर्ने छन् ।

प्रधानमन्त्री कार्यालयका अनुसार, उक्त औपचारिक वार्ता अपरान्ह ४ देखि साँझ ७ का बीचमा हुने भनिएको छ तर समय अझै निश्चित हुन बाँकी छ । औपचारिक वार्ता ४ बजे नै शुरू भए वार्ता पछि र वार्ता ढिलो शुरू हुने भए वार्ता अघि वुर्ज खलिफा टावर भ्रमणको कार्यक्रम मिलाइने छ ।
वार्ताको समय निश्चित भएपछि राजदूतावासले नेपाली समुदायका सदस्यहरूसँग समन्वय गरेर नेपालीहरूसँगको भेटघाटको कार्यक्रम तय हुनेछ ।
प्रधानमन्त्रीले सोही दिन नेपाली समुदायसँग छलफल गर्नेछन् ।

माघ ३ गते प्रधानमन्त्रीले वल्र्ड फ्युचर इनर्जी समिटमा मुख्य वक्ताका रुपमा आबुधाबीमा सम्बोधन गर्नेछन् । उर्जाका क्षेत्रमा विश्वमा देखिएको संकट, उर्जाको विकासमा गरीब तथा अल्पविकसित देशहरुले भोग्नुपरेका चुनौती र नेपालमा उर्जा क्षेत्रमा वैदेशिक लगानीका सम्भावनालगायतका विषयमा प्रधानमन्त्रीको सम्बोधन केन्द्रीत हुने छ ।

सोही दिन प्रधानमन्त्रीले संयुक्त अरब इमिरेट्सका सैन्य प्रमुख तथा राजकुमार शेख मोहम्मद बिन जायेद अल नाह्यानसँग भेट गर्नेछन् । यसैगरी उनले राष्ट्रपति मामिलासम्बन्धी मन्त्री तथा उपप्रधानमन्त्री शेख मन्सुर बिन जायाद अल नाह्यानसँग समेत भेट गर्नेछन् ।

उर्जा सम्मेलनपछि प्रधानमन्त्रीले आबुधाबीमा रहेका नेपाली समुदायसँग छलफल गर्ने कार्यक्रम रहेको छ । सोही साँझ आबुधाबीमा नेपाल राजदूतावासले आयोजन ागर्ने डिनरमा प्रधानमन्त्री सहभागी हुने कार्यक्रम छ ।
प्रधानमन्त्री प्रचण्ड माघ ४ गते स्वदेश फर्किनेछन् ।

कमेन्ट गर्नुहोस्

%d bloggers like this: