संसद बैठकमा सत्तारुढदेखि प्रतिपक्षीले भने- ‘छिटो चुनावको मिति घोषणा हुनुपर्यो’

काठमाडौँ, माघ ७ । व्यवस्थापिका–संसद्को आजको बैठकमा प्रमुख दलका नेता तथा सांसदले अविलम्ब स्थानीय निकायको निर्वाचनको मिति घोषणा गर्न सरकारसँग माग गरेका छन् ।

बैठकको विशेष समयमा नेपाली काँग्रेसका सांसद रामचन्द्र पौडेलले स्थानीय तह वा निकाय जुनसुकै संरचनामा भए पनि निर्वाचन गराउन माग गरे । संविधान संशोधन प्रस्ताव पास गराएर निर्वाचनको वातावरणमा मुलुकलाई केन्द्रित गराउनुपर्नेमा उनले जोड दिए । पौडेलले भने – “स्थानीय निर्वाचन नगरी सुरुमा केन्द्रीय निर्वाचन गर्ने कुरा हुन सक्दैन । स्थानीय, प्रदेशको निर्वाचन गरेर केन्द्रीय निर्वाचन गर्नुपर्छ ।”

याे पनि पढ्नुस  अबदेखि प्रधानमन्त्री, मन्त्रीलाई सांसदले प्रत्यक्ष प्रश्न सोध्न पाउने

उनले स्थानीय निकाय पुनःसंरचना आयोगले पेस गरेको प्रतिवेदन यथावस्थामा कार्यान्वयन हुन नसक्ने बताए । प्रतिवेदनमा मधेसी, जनजाति, दलित र उत्पीडित असन्तुष्ट भएकाले समावेशिता र लोकतन्त्रको मान्यता अनुकूल सम्बोधन हुनुपर्ने सांसद पौडेलले बताए ।

नेकपा (एमाले)का भीमबहादुर रावलले सरकारले मन्त्री पद र संविधान संशोधनलाई साटासाट गरेको आरोप लगाए । उनले सरकारकै कारण ‘राष्ट्रियताका प्रतिकूल गतिविधि’ भएको आरोप लगाउँदै निर्वाचनको मिति घोषणा हुन नसकेको बारेमा प्रधानमन्त्रीले सदनमा जवाफ दिनुपर्ने माग गरे ।

याे पनि पढ्नुस  निर्वाचनसम्बन्धी एक विधेयक पारित, सरकारलाई चुनाव मिति घोषणा गर्न सहज

नेता रावलले स्थानीय निकाय पुनःसंरचनाको प्रतिवेदन कार्यान्वयन हुनुपर्नेमा जोड दिँदै चाँडो निर्वाचनको मिति तोक्न आग्रह गरे । उनले खुला रुपमा देश विखण्डन गर्नेजस्ता कानुन र कूटनीतिक मर्यादा विपरीतका गतिविधि हुँदा पनि सरकारले ध्यान नदिएकोमा असन्तुष्टि जनाए ।

नेकपा (माओवादी केन्द्र)का रामनारायण बिंडारीले संविधान संशोधन गर्ने मूल थलो सदन नै भएकाले त्यसलाई कसैले रोक्न नहुने बताए ।

राष्ट्रिय प्रजातन्त्र पार्टीका परशुराम तामाङले स्थानीय निकाय नहुँदा जनता समस्यामा परेकाले छिटोभन्दा छिटो निर्वाचन हुनुपर्ने माग गरे । राष्ट्रिय जनमोर्चाका मीना पुनले सरकारले छिटोभन्दा छिटो स्थानीय निर्वाचनको कार्यतालिका ल्याउनुपर्ने बताए । विशेष समयमा नरसिंह चौधरी, प्रेम सुवाल, गङ्गा चौधरी सत्गौवा, जनकराज जोशी, पुरुषोत्तम पौडेल, उमेशकुमार यादव, अनन्तप्रसाद पौडेल, भरतकुमार शाह र हर्कबोल राईले पनि भाग लिएका थिए ।

याे पनि पढ्नुस  सरकार ! शिलान्यास भयो तर कुनै संरचनाहरु बनेनन्

त्यसअघि शून्य समयमा काँग्रेसका रामहरि खतिवडाले संविधान कार्यान्वयनका लागि कार्यतालिका बनाएर अघि बढ्न माग गरे । एमालेका रामेश्वर फुयाँलले काठमाडौँका भत्किएका र धुले सडक चाँडो मर्मत गर्न माग गरे । बैठक जारी छ ।

कमेन्ट गर्नुहोस्