वर्षमा १३ अर्बको विद्युत् चोरी : कसरी हुन्छ बिजुली चोरी ?

काठमाडौं, माघ १० । नेपाल विद्युत् प्राधिकरणकै कर्मचारीको मिलेमतोमा वर्षाैँदेखि ठूला उद्योगहरूलाई निःशुल्क बिजुली दिइँदै आएको खुलेको छ ।

कमिसन लिएर उद्योगीलाई निःशुल्क बिजुली दिँदै आएका प्राधिकरणका १२ कर्मचारी र चार व्यवसायीलाई प्रहरीले आइतबार पक्राउ गरेको छ । महानगरीय अपराध महशाखाले प्राधिकरणका सुपरभाइजर र मिटररिडरहरूलाई पक्राउ गरेको हो । पक्राउ परेकामध्ये केही कर्मचारी ट्रेड युनियनका नेता हुन् । मनिज श्रेष्ठ कर्मचारी संघको कोषाध्यक्ष हुन् भने दिलबहादुर साउद केन्द्रीय सदस्य । त्यस्तै, महादेव प्रधान कर्मचारी युनियन विद्युत् प्राधिकरण इकाइका सल्लाहकार हुन् । प्राधिकरणका उच्च अधिकारीहरू हेटौंडा गएका बेला प्रधानले आफ्नै घरमा मिटर रिडिङका उपकरण राख्ने गरेका थिए ।

यसरी हुने गरेको छ बिजुली चोरी
प्रसारण लाइनबाट डाइरेक्ट हुकिङ गर्ने, घरमा राखिएको मिटर रिडिङ गर्न नदिने, पुराना मिटरलगायतका विधिबाट बिजुली चोरी हुने गरेको छ । कतिपय ठाउँमा प्राधिकरणकै कर्मचारीको मिलेमतोमा पनि चोरी हुने गरेको छ । राजनीतिक दबाबका कारण प्रशासनले विद्युत् चोरीमा संलग्न व्यक्तिलाई कारबाही गर्न सकेको थिएन । प्राधिकरणका क्रियाशील ट्रेड युनियनले कर्मचारी सरुवामा हस्तक्षेप गर्दा पनि चोरी नियन्त्रणमा समस्या रहेको प्राधिकरणका कर्मचारीहरू बताउँछन् ।

याे पनि पढ्नुस  विद्युत् प्राधिकरणका सञ्चालकलाई नहटाउन सर्वोच्चको अल्पकालीन अन्तरिम आदेश

एक महिना लामो अप्रेसन
देशमा ठूलो मात्रामा विद्युत् चोरी हुने गरेको र यसमा प्राधिकरणका कर्मचारीको मिलेमतो रहेको सूचनाका आधारमा प्रहरीले एक महिनादेखि अनुसन्धान सुरु गरेको थियो । मिटर घटाउँदा–घटाउँदैकै भिडियोसमेत खिचेपछि प्रहरीले उनीहरूलाई पक्राउ गरेको हो । अपराध महाशाखाले काठमाडौंमा मात्र अनुसन्धान गरेको हो । मिलेमतोमा उद्योगको मिटर बिगार्ने काम देशभरि रहेको स्रोत बताउँछ ।

याे पनि पढ्नुस  १२ वर्षदेखि विद्युत चोरीमा संलग्न सुपरभाइजरसहित प्राधिकरणका १६ जना पक्राउ

मासिक कमिसन खाएर मिटर घटाउने गरिन्छ
पक्राउ परेका कर्मचारीले महिनामा लाखौँको विद्युत् खपत गर्ने उद्योगहरूबाट कमिसन लिएर मिटर घटाउने गरेको अपराध महाशाखाका प्रमुख एसएसपी सर्वेन्द्र खनालले बताए । ‘सयौँ उद्योगबाट उनीहरूले मिटर घटाएर पैसा लिने गरेको देखिन्छ,’ खनालले भने, ‘ऊर्जा मन्त्रालय र विद्युत् प्राधिकरणसँगको सहकार्यमा हामीले उनीहरूलाई पक्राउ गरेका हौँ ।’ प्रहरीले पक्राउ परेका कर्मचारी र व्यवसायीलाई ठगी मुद्दामा अदालतबाट म्याद थप गरी हिरासतमा राखेको छ । पक्राउ परेका कर्मचारीलाई प्राधिकरणले आइतबार नै निलम्बन गरेको छ ।

याे पनि पढ्नुस  देशभर लोडसेडिङ नहुने, २२० मेगावाट आयात गरिँदै

दिनकै कमाइ ५० हजार
प्राधिकरणको बालाजु कार्यालयमा कार्यरत सुमन श्रेष्ठ पाँचौँ तहका कर्मचारी (सुब्बा) हुन् । तर, उनी निजी कारमा कार्यालय आउने–जाने गर्छन् । विद्युत् चोरीबाटै उनले करोडौँ सम्पत्ति कमाएको अनुसन्धानमा आबद्ध प्रहरी अधिकारीहरू बताउँछन् । प्रहरीले उनको बा.५च ३४५१ नम्बरको गाडीसमेत नियन्त्रणमा लिएको छ । एक दिनमै उनीहरूले लाखभन्दा धेरै कमाउने गरेको प्रहरीको भनाइ छ । एसएसपी खनालका अनुसार एक दिनमै २०–२५ ठाउ“मा मिटर घटाएर उनीहरूले कम्तीमा पाँच हजारदेखि ५० हजारसम्म लिने गरेको अनुसन्धानमा खुलेको छ । त्यसरी लिएको पैसा कर्मचारीहरूले बाँडेर लिने गरेका थिए यो खबर आजको नयाँ पत्रिकामा छ ।

कमेन्ट गर्नुहोस्