प्रहरी, भ्रष्टाचार र आतंकवादमाथिको गहिरो प्रहारः चलिचत्र जोली एलएलबी–२

न्याय पाउनको लागि एक सामान्य नागरिकले व्यवस्थासंग लड्नुपर्ने राज्यको निरिहताले हरेक नागरिक कानुन र व्यवस्थाप्रति सकरात्मक हुन सक्दैनन ।

चलचित्रः जोली एलएल बी २
निर्देशकः सुभाष कपुर
कलाकारः अक्षय कुमार, अन्नु कपुर, हुमा कुरैशी, सौरभ शुक्ला, मानव कौल


प्रहरी इनकाउन्टरको नाममा एक निर्दोषकाे हत्या, हत्या लुकाउन पदको दुरुपयोग, भ्रष्टाचार अादिले समाज कुन दिशातर्फतिर गइरहेको छ भन्ने सजिलै आ‌ंकलन गर्न सकिन्छ । न्याय पाउनको लागि एक सामान्य नागरिकले व्यवस्थासंग लड्नुपर्ने राज्यको निरिहताले हरेक नागरिक कानुन र व्यवस्थाप्रति सकरात्मक हुन सक्दैनन । समाजमा दुइ थरिका मानिस छन्  , एक सत्यको पक्षमा सधै‌ं वकालत गर्ने र अर्को शक्त्तिको अाडमा राज्यको व्यवस्थालाई नै दवाउन खोज्ने । तर सत्यको पछि लाग्ने हो भने एक न एक दिन न्यायको ढोका खुल्छ नै । यही कुरालाई चलचित्र जोली एलएल बी २ ले  दर्शाउने प्रयास गरेको छ । समाज,व्यवस्था, प्रहरी, भ्रष्टाचार, आतंकवाद  र हाँस्यको  समिश्रण चलिचत्र हो जोली एलएलबी–२ । 

कथाः जोली एलएलबीको कथा कानपुरमा बस्ने एक वकील जगदीश्वर मिश्रा अर्थात जोली अक्षय कुमारको हो । जोली लखनउमा एक ठुलो वकिलको सहाकय वकील हुन्छन् । तर उनी वकालत भन्दा पनि घरको काम नै बढी गरिरहेका हुन्छन् ।

जोलीले आफ्नै चेम्बर बनाउन सपना देखेका हुन्छन् । उनी राम्रो मुद्धाको खोजीमा हुन्छन् । उनको भेट एकदिन एक विधुवा र गर्भवति हिना (सयानी गुप्ता)संग हुन्छ । उनको श्रीमानलाई प्रहरी इन्काउन्टरमा मारिएको हुन्छ । हिना न्याय पाउनको लागि जोलीसंग उनको हाकिम वरिष्ठ वकिलसंग मुद्धा लड्नको लागि सिफारिस गरिदिन आग्रह गर्छिन ।
जोलिले सुरुमा कुरा गर्न गार्हो भएपनि एकपटक कुरा गर्ने बचन दिन्छन् । हिना वकिललाई दिने रकमको बन्दोबस्त गर्न जान्छिन् ।

यता जोलीलाई आफ्नो चेम्बर खोल्न जतिसक्यो छिटो २ लाख जम्मा गर्न दवाव आउँछ तर जोलीसंग पैशा हुँदैन । उनले हिनासंग झुठो बोल्दै उनको मुद्धा लड्न हाकिम तयार भएको भन्दै २ लाख माग्छन् ।

जोलीले आफ्नो चेम्बर खोल्छन् , बुवालाई आफु पनि ठुलो वकिल भएको देखाउँछन्, श्रीमती छोरासंग आफ्नो सपना साकार भएकोमा खुसी साटासाट गरिरहेको बेला हिना आइपुग्छिन् । हिनाले सबैकुरा थाहा पाएर जोलीसंग झगडा गर्छिन् । उनको मन टुट्छ र  आफ्नो वितेको श्रीमान सम्झंदै उनले आत्महत्या गर्छिन ।

जब हिनाले आत्महत्या गर्छिन अनि कथाले नयाँ मोड लिन्छ । जोलीले हिनाले आत्महत्या गर्नुको कारण आफुँ भएको महसुस गर्दै हिनालाई न्याय दिलाएरै छाड्ने अठोट लिन्छन् । जोलिको यो कदममा उनको श्रीमती पुष्पा पाण्डे (हुमा कुरैशी)ले पनि साथ दिन्छिन् ।

अदालतमा जोलिको टकराव लखनउका प्रशिद्ध वकिल प्रमोद माथुर (अन्नू कपूर) संग हुन्छ । अदालतको न्यायाधीश सुंदरलाल त्रिपाठी (सौरव शुक्ला) ले आफ्नो व्यवहारबाट सबैलाई हसाउने प्रयास गरेका छन् । हिनाको मुद्धा अध्ययन गर्दै जाँदा जोलिले अनेकौं रहस्य पत्ता लगाउँदै जान्छन् । उनले यो मुद्धा लड्न थालेपछि थाहा पाउँछन् की हिनाको मुद्धा सजिलो छैन । उनीमाथि हमला हुन्छ, तर पनि जोलि अगाडी बढ्छन् । उनले कयौं शक्तिशाली व्यक्तिको सामना गर्नुपर्छ । उनले कसरी यो मुद्धालाई न्याय दिन्छन् यही नै कथाको मुख्य सार हो ।

निर्देशनः जोली एलएल बी र फंस गए रे ओबामा जस्ता हास्यप्रद चलचित्रमा सफलता पाएका निर्देशक सुभाष कपुर बलिउडमा देशी निर्देशकको रुपमा चिनिन्छन् । उनको चलचित्रमा स्थानिय भाषाको झलक देखिन्छ जुन जोली एलएल बी–२ मा पनि देखिएको छ । कपुरले चलचित्रको कथा ,स्क्रीनप्ले, संवाद र निर्देशन एकसाथ गरेका छन् । उनले अदालतमा हुने बहसमा प्रहरी, भ्रष्टाचार र आतंकबाद जस्ता मुद्धालाई उठाउँदै हसाउने प्रयास सफल रुपमा गरेका छन् । उनको निर्देशन उत्कृष्ट छ ।

अभिनयः जोलीको भुमिकामा अक्षय कुमारको अभिनय दमदार छ । बलिउड स्टार अक्षयले सच्चा वकिलको भुमिकालाई न्याय दिएका छन् । उनको करियरमा जोली एलएल बी २ को अभिनय लामो समयसम्म मानिसले सम्झनेछन् । उनको कमेडी पनि निकै रोमान्चक छ । यस्तै विपक्षी वकीलको रुपमा अन्नु कपुर पनि जमेका छन् । चलचित्र हेरेपछि उनलाई दर्शकले घृणा गर्नु नै उनको सफलता हो । हुमा कुरैसीको भुमिका ठुलो नभएपनि उनको उपस्थिति राम्रो छ । न्यायधिसको भुमिकामा सौरभ शुक्लाले सबैलाई खुब हसाएका छन् । उनको भुमिका चलचित्रमा हेर्न लायकको छ । हिनाको भुमिका निभाएकी सयानी गुप्ताको अभिनय दमदार छ । उनले आफुँले धोका पाएपछि अक्षयसंग गरेको झगडाको सिनमा निकै राम्रो प्रभाव छोडेकी छिन् । चलचित्रमा अन्य कलाकारको अभिनय पनि राम्रो छ ।

किन हेर्नेः पुर्ण मनोरन्जनको लागि चलचित्र जोली एलएलबी २ हेर्न सक्नुहुन्छ । यसमा अदालतमा हुने ड्रामा, हास्य, सामाजिक मुद्धा, न्याय आदि विषयलाई व्यवस्थित ढङ्गबाट प्रस्तुत गरिएको छ । परिवारको साथमा यो चलचित्र हेर्न जान सक्नुहुन्छ ।

कमेन्ट गर्नुहोस्