विमानस्थलमा चितुवा पसेको हल्ला, खोज्दा स्याल भेटियो

काठमाडौं, चैत  २२ । माउन्टेन फ्लाइट र आन्तरिक उडानको अत्यधिक चाप रहने त्रिभुवन अन्तर्राष्ट्रिय विमानस्थलमा बिहानको समयमा सानो अवरोधले पनि ठूलो प्रभाव पार्छ । सोमबार बुद्ध एयरका पाइलटले जहाज उडाउने क्रममा विमानस्थलमा चितुवा पसेको देखिएको खबर गरेपछि हंगामा सुरु भयो ।

करिब १५ मिनेट (बिहान ८ बजेदेखि सवा ८ बजेसम्म) धावनमार्ग नै बन्द गरी चितुवा खोज्नुपरेपछि यात्रुले सास्ती त व्यहोर्नुपर्यो, नै व्यवस्थापन गर्नसमेत हम्मेहम्मे पर्यो । आकस्मिक उद्धारका लागि अग्निनियन्त्रक, सेना, प्रहरीलगायत टोली तयारी हालतमा पुग्यो भने चितुवा समाउन जिल्ला वन कार्यालयको प्राविधिक टोलीसमेत पुग्यो ।

याे पनि पढ्नुस  त्रिभुवन विमानस्थल २४ सै घण्टा संचालन गर्ने मन्त्री रवीन्द्र अधिकारीको उद्घोष

विमानस्थल कार्यालयका एक अधिकारीका अनुसार टोलीले पाइलटको दाबीअनुसार चितुवा फेला पारेन, त्यसपछि झाडीमा लुकेर बसेको भए भगाउने उद्देश्यले पानीको फोहरा हानियो । त्यसपछि पनि सिकारीले निरन्तर निगरानी गरिरहे । यसैक्रममा सोमबार साँझ सिकारीले ट्याक्सी वे ‘चार्ची सी’नजिकैको ड्रेनमा दुईवटा स्यालका बच्चा मृत अवस्थामा फेला पारेका छन् ।

याे पनि पढ्नुस  एयरपोर्टको इमर्जेन्सी गेट बन्द गर्न निर्देशन

विमानस्थलको धावनमार्ग प्रवेश गर्ने पाँचवटा ट्याक्सी वेमध्ये ‘सी’ नम्बरको वेनजिकको नालामा दुईवटा स्यालका बच्चा मरेको अवस्थामा फेला परेको विमानस्थलका प्रवक्ता प्रेमनाथ ठाकुरले पुष्टि गरे । ‘हाम्रो आशंकाअनुसार चितुवा दाबी गरिएको जनावर स्याल थियो,’ उनले भने, ‘तर, सिकारीहरूले विमानस्थललाई निरन्तर निगरानीमा राखिरहेका छन् ।’ त्रिभुवन विमानस्थलमा निरन्तर जंगली जनावर, कुकुर तथा चराहरूका कारण उडान–अवतरण जोखिमपूर्ण बन्दै गएको छ ।

याे पनि पढ्नुस  ठूलो परिमाणमा डलरसहित त्रिभुवन विमानस्थलबाट भिक्षुहरू पक्राउ

यो खबर आजको नयाँ पत्रिकामा छ ।

कमेन्ट गर्नुहोस्