मधेसवादी दलद्वारा संसद बैठक बहिस्कार

काठमाडौं, चैत २५ । शुक्रबारको संसद बैठक पनि मधेस केन्द्रित दलले बहिस्कार गरेका छन् । संविधान संशेधन लगायतका माग पूरा हुनु पर्ने भन्दै मधेसी दलले लगातार संसद बैठक बहिस्कार गर्दै आएका छन् ।

व्यवस्थापिका–संसद्को आजको बैठकको शून्य समयमा सांसदहरुले राष्ट्रिय तथा स्थानीय समस्या समाधानका लागि संसद् र सरकारको ध्यानाकर्षण गराए ।

उनीहरुले सप्तरीमा हात्तीको आक्रमणबाट नागरिकको ज्यान गएको तर सरकारी निकायले ध्यान नदिएको भन्दै संसद्मार्फत सरकारको ध्यानाकर्षण गराए ।

यस्तै स्थानीय तहको निर्वाचनको मिति घोषणा भएपछि युवा तथा खेलकुद मन्त्रालयले खेलकुदको नाममा बजेट विनियोजन गरेको भन्दै आपत्ति जनाए ।

स्थानीय तहको निर्वाचनको मिति नजिकिँदै गर्दा प्रदेश नं २ मा अझै पनि निर्वाचनको माहोल बन्न नसकेको भन्दै तत्काल वातावरण बनाउन उहाँहरुले आग्रह गरे ।

तेजुलाल चौधरी, धना पहरी, पुरुषोत्तम पौडेल, प्रतीक्षा तिवारी मुखिया लगायत सांसदहरुले धारणा राखेका थिए ।

शुक्रबारको बैठकमा नेकपा एमालेका भीम आचार्यले उपप्रधानमन्त्रीको वरिष्ठता विवादले मन्त्री परिषदको बैठक नबसेको भए त्यो देशकै लागि लज्जाको विषय भएको बताए । यस्तै अन्य दलका सांसदहरुले समसामयिक विषयवस्तुमा आफ्नो धारण राखेका छन् ।

कमेन्ट गर्नुहोस्

%d bloggers like this: