नयाँ वर्षको अवसरमा मुसहरहरुलार्इ नमुना बस्ती हस्तान्तरण

बर्दिवास, चैत २७  । महोत्तरीको बर्दिवासस्थित एकीकृत नमुना मुसहर बस्ती आगामी वैशाख १ गते मुसहरलाई हस्तान्तरण गरिने भएको छ ।

गत पुस २५ गते शिलान्यास गरेर निर्माणको काम थालिएको सो बस्ती निर्माणको कार्य सम्पन्न भइसकेको धुर्मुस सुन्तली फाउन्डेसनका सीताराम कट्टेलले आज बर्दिवासमा आयोजित सर्वपक्षीय बैठकमा जानकारी दिनुभयो ।

फाउन्डेसनले निर्माण सुरु गरेको ९५ औंँ दिनभित्रै काम सकिएको छ ।

वैशाख १ गते बिहान ८ बजे सुरु हुने हस्तान्तरण समारोहमा गत पुस २५ गते हास्यकलाकार मह जोडीले शिलान्यास गरेको सो बस्तीमा ५० घरधुरी मुसहरका लागि ५० घर, एउटा सामुदायिक भवन, दुई सार्वजनिक शौचालय, बालोद्यान, दृश्यस्तम्भ र मुसहरका कुलदेवता दिनभद्रीको मन्दिर बनेका छन् ।

यसैगरी विगतमा मुसहर बस्तीभित्रै बस्दै आएका अन्य समुदायका तीन परिवारका लागि फाउन्डेसनले थप तीन घर बनाएको छ ।

सबै घर खानेपानी धारा, शौचालय, बिजुली र सडक सुविधासँग जोडिएको तथा अपाङ्गता भएका, बालबालिका र वृद्धवृद्धा वातावरणमैत्री बनेको फाउन्डेसनका परियोजना प्रबन्धक अर्जुन न्यौपानेले जानकारी दिनुभयो ।

बस्तीको निर्माण लागत करिब रु पाँच करोड छ ।

कमेन्ट गर्नुहोस्

%d bloggers like this: