नारायणगढ–मुग्लिन सडकमा पहिरो खस्यो, सडक अवरुद्ध

चितवन, वैशाख १ । नारायणगढ मुग्लिन सडकखण्डको चारकिलो भन्ने ठाउँमा शुक्रबार बिहानदेखि सुक्खा पहिरो खसेपछि सडक अवरुद्ध बनेको छ ।
नारायणगढ मुग्लिन सडक आयोजनाका इन्जिनियर शिव खनालका अनुसार पहिरो पन्छाउने काम थालिएको छ । थप पहिरो नखसेमा एक घन्टाभित्रमा सडक सञ्चालनमा आउने उहाँले बताउनुभयो ।
यद्यपि तीन दिनयता सो ठाउँमा पहिरो खसिरहेकाले यकिन भन्न नसकिएको उहाँले बताउनुभयो । तीन दिनअघि सोही ठाउँमा खसेको पहिरोले बोलेरो जिप पुरिएको भए पनि मानवीय क्षति हुनबाट जोगिएको थियो ।
पहिरो बढी खसेपछि बिहान सवा नौ बजेबाट सडक अवरुद्ध भएको हो । सडक स्तरोन्नतिका क्रममा भित्तो काटिएको ठाउँमा पहिरो खसेको हो ।
झण्डै ३५ मिटर माथिबाट पहिरो खसेको होे । पहिरो खसेको ठाउँ मुग्लिनबाट चार किलोमिटर नारायणगढतर्फ कालीखोला र पाँचकिलोको बीचमा पर्दछ । दैनिक बिहान १० बजेबाट ४ बजेसम्म सडक रोकेर काम हुँदै आएको छ । सडक रोक्नु अघि बाटो कट्न छिरेका ठूलो सङ्ख्यामा सवारीसाधन सडक अवरुद्ध भएपछि जाममा परेको प्रहरीले जनाएको छ । रासस

कमेन्ट गर्नुहोस्

%d bloggers like this: