विदेश जान बिदाई गरेको दुइ दिनमै छोराको मृत्यु

सिन्धुली, बैसाख ८ ।  छोराले विदेशबाट पैसा कमाएर ल्याउला अनि दुःखका दिन सकिएला भन्ने ठानेका बालाबखर ८ धनुषाका रामबुझाम मण्डलको सपना अधुरै रह्यो । छोराले दुःख गरेर भए पनि पैसा कमाएर ल्याउला र साहुको ऋण तिरौंला भनेर वैदेशिक रोजगारीका लागि विदाइ गरिएको छोराको दुई दिनमै शव देखेपछि मण्डलको सपना मात्र अधुरो रहेन, सदाका लागि काख नै रित्तियो । उहाँको बुढेसकालाको सहारा नै गुम्यो ।

मलेसिया हिँडेका बालाबखर ८ धनुषाका सरोजकुमार मण्डलको बुधबार बीपी राजमार्गअन्तर्गत सिन्धुलीको कमलामाई नगरपालिका २ पीपल भन्ञ्याङमा भएको बलेरो दुर्घटनामा मृत्यु भएपछि मण्डल परिवारमा यस्तो बज्रपात परेको हो । छोराको शव बुझ्न बिहीबार सिन्धुली अस्पताल आइपुग्नुभएका रामबुझम मण्डल घरी बर्बराउने, घरी अचेत हुनुहुन्छ । ‘छोरालाई हाँसीखुसी विदाइ गरिएको दुई दिनमै मुख देख्न पाइएन’, बर्बराउँदै उहाँले भन्नुभयो, ‘अब जिन्दगीका सबै सपना चकनाचुर भए ।’

याे पनि पढ्नुस  पिकअपबाट खसेर एक युवाको मृत्यु

कतारमा तीन वर्ष बसेर एक वर्षअघि घर आउनुभएका सरोज पुनः वैदेशिक रोजगारका लागि मंगलबार घरबाट विदा भएर काठमाडौं जानुभएको थियो । म्यानपावर कम्पनीले बुधबारको टिकट नमिलेर आगामी सोमबारका लागि मात्र टिकट हुने भनेपछि उहाँ फेरि घर फर्कंदै हुनुहुन्थ्यो । घर फर्कने क्रममा उहाँ चढेको बलेरो जिप सडकबाट २ सय मिटर तल खस्दा सरोजको घटनास्थलमै मृत्यु भयो ।

‘बुबा अचेत हुन थाल्नुभएको छ । घरमा आमा घटना थाहा पाएदेखि नै अचेत अवस्थामा हुनुहुन्छ’, मृतक सरोजका भिनाजु फूलमान मण्डलले दुखेसो पोख्दै भन्नुभयो ।’ सरोजसँगै वैदेशिक रोजगारीमा हिँडेका सोही ठाउँका जयकुमार यादवको पनि दुर्घटनामा मृत्यु भएको छ । उहाँको परिवारमा पनि रुवाबासी छ । सरोज र जयकुमारको घटनास्थलमै मृत्यु भएको सिन्धुलीका प्रहरी प्रमुख उमाशंकर पञ्जियारको भनाइ छ ।

याे पनि पढ्नुस  सुर्खेतबाट काठमाडौं आउँदै गरेको बस दुर्घटना, २३ घाइते

‘साहुसँग ऋण काढेर विदेश हिँडेको झन्डै ज्यान गएन’, दुर्घटनाका गम्भीर घाइते राकेशकुमार यादवले भन्नुभयो, ‘सँगैका साथी गुमाउनुपर्‍यो । आफ्नो खुट्टा गुम्यो ।’ ‘बाँचेर पनि अब केही गर्न नसकिने भयो’, उहाँले भन्नुभयो । उहाँसँगै गम्भीर घाइते जितनाराण यादवको पनि अवस्था उस्तै छ । ‘एउटा खुट्टा तीन ठाउँमा भाँच्चिएको छ । शरीरभरि चोट लागेको छ ।

धन्न बाँचियो’, उहाँले भन्नुभयो । जितनारायण पहिलो पटक वैदेशिक रोजगारीका लागि मलेसिया जान लाग्नुभएको थियो । गाउँका सबै साथी विदेश जाने भनेपछि आफू पनि सँगै हिँडको उहाँले बताउनुभयो । मलेसियाका लागि बालाबखर ८ धनुषाका दसजना युवा एकै पटक घरबाट निस्केका थिए । उहाँहरू भनेको समयमा टिकट नपाएपछि थप दुई दिन घरमा बस्ने र सोमबार उड्ने गरी आइतबार काठमाडौं जाने तयारीका साथ बलेरो रिजर्भ गरी बुधबार घर फर्कंदै हुनुहुन्थ्यो ।

याे पनि पढ्नुस  पूर्वी चितवनमा बसको ठक्करबाट एकको मृत्यु, दुई गम्भीर घाइते

बलेरोमा सवार आठजना गम्भीर घाइते छन् । गम्भीर घाइतेमध्ये एकजनाको काठमाडौंमा र अन्य सातजनाको जनकपुरमा उपचारका लागि सिन्धुली अस्पतालले रेफर गरेको छ । बुधबार काठमाडौंबाट धनुषातर्फ आउँदै गरेको बा १ ज ५ नम्बरको बलेरो दुर्घटना भएको थियो ।

यो खबर आजको अन्नपूर्ण पोस्टमा छ ।

कमेन्ट गर्नुहोस्