सबैको सहभागिताको निर्वाचनले प्रजातान्त्रिक अभ्यासलाई बलियो बनाउँछ : नेता राणा

काठमाडौँ, वैशाख ११ । राष्ट्रिय प्रजातन्त्र पार्टीका वरिष्ठ नेता पशुपतिशम्शेर राणाले सबैको सहभागितामा हुने स्थानीय तहको चुनावले प्रजातान्त्रिक अभ्यासलाई बलियो बनाउने बताएका छन् ।

पार्टीको कामपा वडा नं ८ इकाइ समितिले पशुपतिस्थित भुवनेश्वर मन्दिरमा आयोजना गरेको कार्यक्रममा बोल्दै नेता राणाले निर्वाचनमा मधेसी मोर्चा सहभागी हुन लागेकोमा त्यसलाई सकारात्मक रुपमा लिनुपर्ने बताए ।

मुलुकमा करिब दुई दशकपछि हुन लागेको स्थानीय तहको चुनावमा सबै दलको सहभागिताले प्रजातान्त्रिक अभ्यासलाई बलियो बनाउने उनले बताए ।

नेता राणाले केन्द्रको अधिकारलाई स्थानीय तहका जनतामा पु¥याएर उनीहरुलाई अधिकार सम्पन्न गराउनका लागि आसन्न चुनाव निर्धारित समयमा नै गर्नुपर्नेमा जोड दिएका छन् ।

पार्टीका केन्द्रीय सदस्य राजाराम श्रेष्ठले मुलुकको विकासका लागि कृषि, पर्यटन र ऊर्जाका क्षेत्रमा सरकारले लगानी बढाउनुपर्ने बताउँदै स्थानीय तहको चुनावमा स्थानीय विकास तथा पूर्वाधार निर्माणका विषयमा प्राथमिकता दिएर घोषणापत्र ल्याउन लागिएको जानकारी दिए ।

समितिका अध्यक्ष हरिशरण राजभण्डारीले हिन्दू धर्मावलम्बीको महत्वपूर्ण तीर्थस्थल तथा विभिन्न पर्यटकीय सम्पदा रहेको उक्त क्षेत्रमा भूकम्पले धेरै क्षति पु¥याएकाले त्यसको संरक्षण गर्नुपर्ने आवश्यकता औल्याए ।

कमेन्ट गर्नुहोस्

%d bloggers like this: