निर्वाचन हुन नदिन भारतको षडयन्त्र !

लोकेश धामी

कैलाली, बैशाख १३ । प्रमुख प्रतिपक्षी दल नेकपा एमालेका उपाध्यक्ष भीम रावलले नेपालको संविधानलाई असफल बनाउने षड्यन्त्रमा भारत लागिपरेको आरोप लगाएका छन् ।

भारतीय स्वार्थ पूर्तिमा नेपाली काँग्रेस, माओवादी र मधेसवादी दलहरुले साथ दिइरहेका उनको आरोप छ । धनगढीमा आज आयोजित पत्रकार सम्मेलनमा पूर्वउपप्रधानमन्त्रीसमेत रहेका रावलले संविधान असफल बनाएर नेपाललाई गन्जागोलको अवस्थामा पु¥याउने र देश टुक्र्याउने षड्यन्त्र भारतले रचेको आरोप लगाए ।

नेपालको संविधान जारी हुनेवित्तिकै नाकाबन्दी लगाएर असफल बनाउने षड्यन्त्रमा लागेको भारतले नेपालमा जहिले पनि राजनीतिक स्थिरता हुन नदिएको उनको आरोप छ ।

याे पनि पढ्नुस  कैलालीमा तीन दिनमा दुईजना डेंगु रोगी फेला

त्यस्तै अहिले भारतको इशारामा नै चुनाव विथोल्ने योजना भइरहेको उनले बताए । माघ ७ गतेभित्र तीन वटै तहको चुनाव गराउनुपर्ने संवैधानिक बाध्यता भएको उल्लेख गर्दै रावलले उक्त मिति भित्र चुनाव हुन नदिएर संविधानलाई ध्वस्त गर्ने रणनीति भारतको रहेको बताए ।

भारतको इशारामा ल्याइएको संविधान संशोधनको प्रस्ताव राष्ट्र हित विपरित रहेको बताए । उपाध्यक्ष रावलले संविधानमा भएका जनताका अधिकार कटौती गर्ने, जनसंख्याको आधारमा स्थानीय तहको संख्या अवैज्ञानिक, अराजनैतिक र अनैतिक रुपमा थप्ने, नेपालीलाई अल्पमतमा पारी विदेशी हावी हुने गरी नागरिकता दिनेजस्ता गम्भीर राष्ट्र विरोधी संशोधनमा राखिएका प्रावधानलाई कुनै हालतमा स्वीकार गर्न नसकिने बताए ।

याे पनि पढ्नुस  रुस्लान अत्तरीया कपमा राईजिङ क्रिकेट वुमन विजयी

सबै भन्दा बढी जनसंख्या भएको प्रदेशमा जनसंख्याको आधारमा स्थानीय तह निर्धारण नगर्ने तर कम जनसंख्या भएको प्रदेशमा नयाँ मापदण्ड कायम गरि जनसंख्याका आधारमा स्थानीय तह निर्धारण गर्न खोजिनु गम्भीर शंका उब्जाएको बताए । जनसंख्याको आधारमा २ र ५ नम्बर प्रदेशका तराईका ११ जिल्लामा मात्र स्थानीय तह हेरफेर गर्न खोज्नु संवैधानिक, राजनीतिक र राष्ट्र हित विपरित कार्य भएको उनले बताए ।

संविधान संशोधनका नाममा तराई र पहाडलाई अहिले छुट्याउने र पछि तराईलाई नेपालबाट टुक्र्याउने षड्यन्त्र भईरहेको उनको आरोप छ । संविधान संशोधनका नाममा निर्वाचन हुन नदिएर माघ ७ गतेपछि देशमा शून्यताको अवस्था सिर्जना गरेर बाह्य हस्तक्षेप निम्त्याउन खोजिएको भन्दै उनले सत्तारुढ दलको कार्यशैलीप्रति आपत्ति जनाए । हार्ने डरले काँग्रेस, माओवादी चुनाव हुन नदिने पक्षमा रहेका उनको भनाई थियो ।

याे पनि पढ्नुस  थरिथरिका फेसबुक साथी

निर्वाचनको सबै तयारी पुरा भईसकेको अवस्थामा सहमतिका नाममा निर्वाचन सारेर निर्वाचन हुन नदिने खाजिएको भन्दै उहाँले बजेट घोषणापछि चुनाव हुन नसक्ने उपाध्यक्ष रावलले धारणा राखे । अर्को प्रसंगमा रावलले प्रदेश नम्बर सातका अधिकांश तहमा एमालेले उम्मेदवारको टुंगो लगाईसकेको बताए ।

कमेन्ट गर्नुहोस्