प्रसूति समस्याका कारण नवजात शिशुको मृत्यु, सात महिनामा १५ गर्भ तुहियो 

रोल्पा, वैशाख २३ । सुत्केरी हुन जिल्ला स्वास्थ्य कार्यालय रोल्पा आएकी जंकोट–९ रोल्पाकी ३० वर्षीया खुमीसरा वलीको नवजात शिशुको शुक्रबार (हिजो)प्रसूति गराउने क्रममा निधन भयो ।

शिशु जन्मन एक हप्ता बाँकी रहेकै बेला शुक्रबार राति करिब १ बजेदेखि प्रसवपीडा भएपछि बिहान परिवारका साथमा वलीलाई जिल्ला अस्पताल ल्याइएको थियो । अस्पताल आइपुग्दा वलीको पाठेघरको मुख खुलिसकेको तथा शिशु उल्टो जन्मिएको प्रसूतिमा संलग्न डा. नजिर खानले जानकारी दिए ।

उनका अनुसार शिशुको टाउकामा दुई पटक नाल बेरिएको र साल पाठेघरको भित्री भागमा टाँसिएर बस्नाका साथै शिशु धेरै ठूलो भएको हुँदा सहजै जन्मन सकेन । पाठेघरको मुख खुलिसकेका कारण शल्यक्रिया गर्न नमिल्ने र त्यस्तो अवस्थामा बाहिर सिफारिस गर्न नमिल्ने भएपछि थप समस्या निम्तिएको थियो ।

याे पनि पढ्नुस  घोडागाउँमा शनिबार भएको आगलागीबाट सात घर जलेर २० लाखको क्षति,बालक घाइते

निकै जोखिम अवस्थामा सुत्केरी भएकी वलीको अधिक रक्तश्राव भएका कारण जिल्ला अस्पतालका ल्याब टेक्निसियन विजयकुमार शाहले एक पिन्ट रक्तदान गरेका थिए । रक्तदानपछि थप उपचारका लागि सुत्केरी वलीलाई शनिबार बिहान २ बजे भेरी अस्पताल नेपालगन्जमा लगिएको छ ।

अहिले उनको भेरी अस्पतालमा उपचार भइरहेको छ । ‘निकै प्रयास गर्दापनि अभिभावकलाई जीवित बच्चा बुझाउन सकिएन तर अथक प्रयासबाट आमाको ज्यान बच्यो यो नै खुसीको कुरा हा’, डा.खानले भने ।

याे पनि पढ्नुस  'आमा छोरी एकैसाथ सुत्केरी हुन्छन्'

वलीका तीन सन्तान उल्टो नै जन्मिएको आफन्तले जनाएका छन् । जिल्ला अस्पतालमा ब्लड बैंक नहुँदा पटक पटक स्वास्थ्यकर्मी तथा त्यहाँका कर्मचारीले नै रगत दिने गरेको अस्पतालले जनाएको छ ।

डा.खानका अनुसार चालु आवमा मात्र जिल्लामा दुई महिलाले ‘इक्ल्याम्सिया’का कारण ज्यान गुमाएको तथा करिब सात महिनामा १५ गर्भ तुहिएका छन् ।

याे पनि पढ्नुस  एकल महिलाको भवनमा डोजर लगाएर भत्काइयो

करिब सात महिनाका अवधिमा ४० गर्भवतीको सफल शल्यक्रिया भएको छ । स्वास्थ्यकर्मीका अनुसार रोल्पामा अन्धविश्वासका कारण अझैपनि जोखिम निम्तिएपछिमात्र अस्पताल आउने गरेका छन् ।

सुरु सुरुमा धामीझाँक्रीकै भरपर्ने र अवस्था जोखिम भएपछि अस्पताल आउने बिरामीको सहज रुपमा उपचार हुन नसक्ने डा.खानले बताए ।

कमेन्ट गर्नुहोस्