ओलम्पिक दिवसका अवसरमा पुरस्कार तथा सम्मान

 

काठमाडौँ, असार ९ । नेपाल ओलम्पिक कमिटीले अन्तर्राष्ट्रिय ओलम्पिक दिवसका अवसरमा आज पत्रकारद्वय राजु सिलवाल र श्याम चित्रकारलाई पुरस्कार प्रदान गरेको छ ।

खेलकुद क्षेत्रको विकासका लागि सञ्चार क्षेत्रका माध्यमबाट सहयोग गरेकाले उहाँहरुलाई यहाँ आज आयोजित कार्यक्रममा नगद रु २५÷२५ हजारसहित सम्मानपत्र दिइएको छ । आधुनिक आोलम्पिक खेलको सुरुआत सन् १८९४ जुन २३ मा भएको हो । त्यसैको सम्झनामा प्रत्येक वर्ष आजको दिन विश्वभर सो दिवस मनाइँदै आएको छ । नेपालसहित विश्वका २०७ राष्ट्र अन्तर्राष्ट्रिय ओलम्पिक कमिटीको सदस्य मुलुकका रुपमा छन् । नेपालले सन् १९६३ मा अन्तर्राष्ट्रिय ओलम्पिक कमिटीको सदस्यता प्राप्त गरेको थियो ।
सोही कार्यक्रममा ओलम्पिकको साताव्यापी कार्यक्रम सञ्चालन गर्न सहयोग पु¥याएका विभिन्न सङ्घसंस्थाका प्रतिनिधि तथा साताव्यापी खेलकुद प्रतियोगितामा सहभागिता जनाएका विद्यालय र खेलाडीलाई समेत सम्मान गरिएको थियो ।
सो अवसरमा कमिटीका अध्यक्ष जीवनराम श्रेष्ठले विश्व परिवेशमा मानिसको आक्रोशलाई न्यूनीकरण गर्न खेलकुदको विकास गरिएको बताउँदै विभिन्न समयमा आएका अनेक उतारचढावले ओलम्पिक खेललाई अहिले स्वस्थ्य जीवन तथा बौद्धिक विकास निर्माणसँग जोडेको उल्लेख गर्नुभयो ।
साताव्यापी कार्यक्रमअन्तर्गत टेनिस, बास्केटबल, कबड्डी, तेक्वान्दो, गल्फ, बक्सिङ, साम्बो, पौडी, चेस, सुटिङ, धनुकाँडलगायत खेल सञ्चालन गरिएको थियो । त्यस्तै जुडोका खेलाडीले सडकमा ट्राफिक व्यवस्थापनमा सहयोग गरेका थिए । रासस

कमेन्ट गर्नुहोस्