नवाज शरीफलाई निशाना बनाएर लाहौरमा ठूलो विष्फोट, ४६ घाइते

लाहौर । पनामा पेपर्स मामिलामा अदालतले अयोग्य ठहर गरेपछि राजिनामा गरेका पाकिस्तानी प्रधानमन्त्रीलाई निशाना बनाएर ठूलो विष्फोट भएको छ ।

पाकिस्तानको ऐतिहासिक शहर तथा शरीफको गृहनगर लाहौरको एउटा पार्किङमा राखिएको ट्रकमा सोमबार राती विष्फोट भएको पाकिस्तानी दैनिक पत्रिका डनले जनाएको छ ।

उक्त विष्फोटमा ४६ जना घाइते छन। चारजनाको अवस्था सिकिस्त बताइएको छ ।

अधिकारीहरुले उक्त ब्लाष्टको निशाना नवाज शरीफ रहेको बताएका छन् । नवाज शरीफ यही बाटोबाट सोमबार राती लाहौर जाने कार्यक्रम रहेको थियो ।

विष्फोट निकै ठूलो भएको र पार्किङमा राखिएका कारहरु दश पन्ध्र फीट माथि हावामा उछालिएको समेत समाचारमा उल्लेख छ । विष्फोटका कारण १५ फीट गहिरो खाडल नै परेको छ । विष्फोटबाट एक सय बढी गाडीहरु क्षतिग्रस्त भएका छन् । कतिपय नजिकका घरहरुका शीसा र छत समेत विष्फोटबाट क्षतिग्रस्त भएका छन् । विष्फोटको आवाज ४, ५ किलोमिटर टाढासम्म सुनिएको बताइन्छ ।

कमेन्ट गर्नुहोस्