नेपालको लगातार दोस्रो हार

काठमाडौं, कात्तिक १८ । अभ्यास खेल खेल्न बंगलादेशमा रहेको नेपाली यु–१९ क्रिकेट टोली दोस्रो हार व्यहोरेको छ ।

नेपाली यू–१९ क्रिकेट टोली बंगलादेश यू–१९ सँग लगातार दोस्रो खेलमा पराजित भएको छ ।शनिबार बंगलादेश यू–१९ ले नेपाललाई १ सय २३ रनले पराजित गर्‍यो ।

मलेसियामा हुने एसीसी यू–१९ एसिया कप क्रिकेटको तयारीका क्रममा तीन खेलको शृंखला खेल्न नेपाली टोली बंगलादेशमा छ ।

बंगलादेशको साभार स्थित बिकेएसपी मैदानमा टस हारेको बंगलादेश यू–१९ ले निर्धारित ५० ओभरमा ८ विकेट गुमाई २ सय २७ रन बनायो । कप्तान सैफ हसनले ६२ रन बनाए । ओपनर सोजिब हुसैन ७ र नाइम शेख २६ रनमा आउट भएपछि हसनले टोहिद हृदलीसँग तेस्रो विकेटमा ५४ रन जोडे ।

हसनले १ सय १५ बल खेली ४ चौका र १ छक्का तथा हृदलीले ५० बल खेली २ चौका र १ छक्का प्रहार गरे । आफिफ हुसैनले ५९ रन बनाएपछि बंगलादेशको स्कोर मजबुत बनेको थियो । ६७ बलको इनिङ्समा उनले २ चौका र ४ छक्का प्रहार गरे । ४ खेलाडी रन आउट गरेको नेपालबाट कप्तान दीपेन्द्रसिंह ऐरी र सन्दीपले २–२ विकेट लिए । दीपेन्द्रले १० ओभरमा ३४ र सन्दीपले ३७ रन खर्चे ।

४० रन बनाउदा ६ विकेट गुमाएको नेपाल ३६।५ ओभरमा १ सय २४ रनमा अलआउट भयो । नवौं नम्बरमा ब्याटिङ गरेका रशिद खानले नेपालबाट सर्वाधिक २४ रन बनाए । ५० बल खेलेका उनले २ चौका र १ छक्का प्रहार गरे । उनले सन्दीपसँग अन्तिम विकेटमा ३७ रन जोडे । सन्दीप १३ रनमा नटआउट रहे ।

नेपालबाट सन्दीप सुनार ३, आशिफ शेख ९, अनिल शाह ३, दीपेन्द्र शुन्य, रोहित पौडेल ९, भिम सार्की ४ र शाहव आलम शुन्य रनमा आउट भएका थिए । बंगलादेशका हसन महमुदले ३ तथा रोनी हुसैन, रोबिउल हक र अफिफ हुसैनले २–२ विकेट लिए ।

कमेन्ट गर्नुहोस्

%d bloggers like this: