चितवनमा वाम गठबन्धनकाे अाक्रमक चुनाबी अभियान

चितवन, कात्तिक २२ । वाम गठवन्धनका चितवन क्षेत्र नं २ (क) प्रदेशका उम्मेदवार घनश्याम दाहाल ‘अनिवास’ले आफू चितवनका तीन ठूला नेतासँग मिलेर विकासका निर्माणका कार्यमा अहोरात खट्ने बताएका छन् ।

चितवन क्षेत्र नं २ क प्रदेश अन्तर्गत कालिका नगरपालिकाको संयुक्त नगर कार्यालय उद्घाटन कार्यक्रममा उनले विकास र सम्वृद्धि मात्रै अवको एक मात्रै एजेण्डा भएकोले पाँच वर्षभित्र आफ्नो क्षेत्रलाई नमूना बनाउने दावी गरे ।

चितवनको पहाडी र समथर भाग समेत समेटिएर क्षेत्र नं २ को क प्रदेश वनेकोले पहाडमा आधुनिक कृषि प्रणाली मार्फत सुन्तला, जुनार, कागती र तरकारी खेती र व्यवसायीक बाख्रा पालन गर्नुका साथै च्यूरीको प्रशोधन केन्द्र स्थापना गर्ने योजना सुनाए ।

शक्तिखोरमा स्थापना हुने औधोगिक क्षेत्रमा स्थानीयले नै रोजगारी पाउने र सोसंगै अन्य विकासका कामहरु अगाडि बढ्ने उनले बताए । पहाडी भेगको पर्यटन, देवघाट क्षेत्रको धार्मिक पर्यटन र शहरी पर्यटनलाई एकीकृत रुपमा योजना बनाई लुम्विनी र पोखरासंग जोड्ने काम गरिने उनले बताए ।
दाहालले चितवनवाट प्रनितिधिसभामा पूर्वप्रधानमन्त्री पुष्पकमल दाहाल प्रचण्ड, पूर्व अर्थमन्त्री सुरेन्द्र पाण्डे र पूर्व सांसद कृष्णभक्त पोखरेलले नै जित हासिल गर्ने दावी गर्दै तीनजना नेताको साथ लागेर समग्र चितवनको विकासमा लाग्ने प्रतिवद्धता व्यक्त गरे ।

नेकपा एमालेका केन्द्रीय नेता केशवलाल श्रेष्ठको प्रमुख आतिथ्य र माओवादी केन्द्रका नेता नारायण दाहालको विशेष आतिथ्यमा सम्पन्न कार्यक्रममा दुवै नेताले स्थायी सरकार र आर्थिक सम्वृद्धिका लागि वाम गठवन्धनका उम्मेदवारले जित्नुपर्ने बताएका थिए ।

बुधबार क्षेत्र नं २ अन्तर्गत कालिका नगरपालिकाको वडा नं २, ६, ७ र ८ वडामा संयुक्त वाम गठवन्धनको प्रचार कार्यालयहरु उद्घाटन गरिएको नेकपा माओवादी चितवनका नेता ईश्वर सापकोटाले जानकारी दिए ।

कमेन्ट गर्नुहोस्