चितवन ३ मा मेरो प्रतिस्पर्धी नै छैन : प्रचण्ड

चितवन, कात्तिक २५ । नेकपा माओवादी केन्द्रका अध्यक्ष एवम् चितवन क्षेत्र नं.३ का प्रतिनिधिसभा सदस्यका उम्मेदवार पुष्पकमल दाहाल ‘प्रचण्ड’  ले चुनावी मैदानमा आफ्नो प्रतिस्पर्धी नै नभएको बताएका छन ।

पेसागत महासंघ नेपाल चितवन शाखाले शनिबार आयोजना गरेको बनभोज कार्यक्रममा संक्षिप्त प्रतिक्रिया दिदैं प्रचण्डले भने, ‘चितवन क्षेत्र नम्बर ३ मा मैले मेरो चुनावी प्रतिस्पर्धी नै देखेको छैन । मेरो प्रतिस्पर्धी नै छैन भन्दा हुन्छ ।’

चितवनबाटै नेतृत्व लिइ विकसित र सम्बृद्ध चितवन बनाउदै नेपाललाई सम्बृद्ध बनाउन चाहेकाले चितवन क्षेत्र नम्बर ३ बाट उम्मेदवारी दिएको प्रचणडले बताए । प्रचण्डले भने, ‘चुनावी मैदानमा कोही प्रतिस्पर्धी नै छैनन् । जित पूर्णरुपमा सुरक्षित छ ।’

वाम गठबन्धनका साझा उम्मेदवार अध्यक्ष प्रचण्डले कांग्रेसको समर्थन रहेका विक्रम पाण्डे आफ्नो प्रतिस्पर्धी नभएको बताए । उम्मेदवारी दर्तादेखि आजसम्म आइपुग्दा विभिन्न पार्टीका हजारै नेता एवम् कार्यकर्ता माओवादीमा प्रवेश गरिसकेकाले वातावरण थप सहज भएको उनले बताए ।

कांग्रेसको समर्थनमा उम्मेदवार बनेका राप्रपा (प्रजातान्त्रिक) का उपाध्यक्ष विक्रम पाण्डेका प्रमुख सहयोगी बद्री तिमिल्सिनासहित सयौं कार्यकर्ता माओवादी केन्द्रमा प्रवेश गरेपछि चितवन प्रचण्डमय भएको छ ।

यति बेला राष्ट्रिय राजनीतिको मिहो बनेका प्रचण्ड गृृहजिल्ला चितवनबाट फेरि एक पटक मुलुकको नेतृत्व गर्ने सोचमा छन ।

वाम गठबन्धन हुँदै पार्टी एकता गरी एउटै कम्युनिष्ट केन्द्र निर्माण गर्ने र वामपन्थीहरुको स्थिर सरकार बनाएर देशमा आर्थिक विकास गरी सम्बृद्ध नेपाल बनाउने अभियानमा छन प्रचण्ड यति बेला ।

प्रचण्डले राष्ट्रिय राजनीतिमा खेलेको सकारात्मक भूमिका, नेतृत्वदायी पहल र इमानदारीलाई लिएर अहिले सर्वत्र प्रशंसा हुने गरेको छ । बृद्धादेखि युवासम्म, हिमालदेखि तराईसम्म, पूर्वदेखि पश्चिमसम्म जतातत्तै प्रचण्डको चर्चा हुने गरेको छ ।

प्रचण्ड यति बेला आफ्नो निर्वाचन क्षेत्रमा घरदैलो कार्यक्रम व्यस्त छन । शनिबार भरतपुर महानगरका २२ नम्बर लगायतका वडामा घरदैलो कार्यक्रम जारी छ ।

कमेन्ट गर्नुहोस्