यी हुन् सरकारी गाडी चढेर चुनाव प्रचारमा रहेका उम्मेदवारहरु

विभागीय र विनाविभागीयमन्त्री, पूर्वउपसभामुख र सांसदहरू
काठमाडौं, मंसिर ३ । बहालवाला मन्त्री र राज्यमन्त्रीले आचारसंहिताविपरीत निर्वाचन प्रचारप्रसारमा सरकारी गाडी प्रयोग गरिरहेका छन् । गाडी दुरुपयोग गर्नेमा पूर्वउपसभामुख र सांसद पनि छन् । संसद् सचिवालयबाट सुविधामा लिएका गाडी उनीहरूले फिर्ता गर्नुको साटो चुनाव प्रचारमा प्रयोग गरिरहेका छन् ।

सात मन्त्री सरकारी गाडीमा चुनाव प्रचार गर्दै
बहालवाला सात मन्त्रीले निर्वाचन प्रचारप्रसारमा सरकारी गाडी प्रयोग गरिरहेका छन् । कांग्रेसको तर्फबाट बर्दिया १ बाट प्रतिनिधिसभा सदस्य उम्मेदवार बनेका सिँचाइमन्त्री सञ्जयकुमार गौतम, बर्दिया २ बाट उम्मेदवार बनेका भूमिसुधार तथा व्यवस्थामन्त्री गोपाल दहित, सोही क्षेत्रबाट माओवादी उम्मेदवार रहेका विनाविभागीयमन्त्री सन्तकुमार थारूले चुनाव प्रचारमा सरकारी गाडी कुदाइरहेका छन् । थारूले जिल्ला प्रशासनबाट गाडी झिकाएर प्रयोग गरिरहेका छन् भने दहित र गौतमले मन्त्रीको हैसियतमा चढ्ने गाडी प्रयोग गरेका छन् ।

कांग्रेसका तर्फबाट धनुषा २ मा प्रतिनिधिसभा सदस्य उम्मेदवार बनेका कृषिमन्त्री रामकृष्ण यादव, कांग्रेसकै तर्फबाट धनुषा ४ मा उम्मेदवार बनेका खानेपानीमन्त्री महेन्द्र यादव र माओवादीका तर्फबाट धनुषा ३ मा उम्मेदवार बनेका विनाविभागीयमन्त्री रामसिंह यादवले पनि सरकारी गाडी दुरुपयोग गरिरहेका छन् । माओवादीको तर्फबाट कालिकोटमा प्रदेश सभामा उम्मेदवार रहेका विनाविभागीयमन्त्री महेन्द्रबहादुर शाहीले पनि सुरु–सुरुमा चुनाव प्रचारमा सरकारी गाडी प्रयोग गरेका थिए । स्थानीयस्तरमा आलोचना हुन थालेपछि उनले सरकारी गाडीको प्रयोग रोकेका छन् ।

याे पनि पढ्नुस  पहाडमा विप्लव, तराईमा जातीय राजनीतिले चुनावी सुरक्षामा चुनौती !

त्यस्तै, उर्जाराज्यमन्त्री कुन्ती शाहीले पनि सरकारी गाडीको दुरुपयोग गरिरहेकी छिन् । उनले सरकार र संसद सचिवालयबाट दोहारो गाडी सुविधा लिएकी छिन् । संसद विघटन भइसक्दा पनि उनी सचिवालयबाट लिएको बा.२झ १६९२ नम्बरको गाडी अझै फिर्ता गरेकी छैनन् । समानुपतिक उम्मेदवार रहेकी उनी गृहजिल्ला दैलेखमा चुनावी प्रचारमा छिन् ।

पूर्वउपसभामुख यादव निर्वाचन अवधिभर जिल्लामै
सरकारी गाडी फिर्ता नगरेका संसद्का पूर्वपदाधिकारीहरू चुनावी प्रचारमा गृहजिल्लामा व्यस्त छन् । पूर्वउपसभामुख यादव १० दिनदेखि सप्तरीमा छन् । स्रोतका अनुसार उनी तत्काल काठमाडौं फर्किने मनस्थितिमा छैनन् । लोकतान्त्रिक फोरमको सचेतकको हैसियतमा सरकारी गाडी प्रयोग गरिरहेका चौधरी अहिले दाङमा छन् । माओवादी केन्द्रकी नेतृ सीता नेपालीसमेत एक महिनादेखि सुर्खेतमा छिन् । उनी दोस्रो चरणको निर्वाचन अर्थात् २१ मंसिरपछि मात्रै काठमाडौं फर्किने छिन् । संसद्को उद्योग वाणिज्य तथा उपभोक्ता हित संरक्षण समितिको सभापतिको हैसियतमा सरकारी गाडी प्रयोग गरिरहेका कांग्रेस नेता भीष्मराज आङदेम्बेले भने शुक्रबार गाडी फिर्ता गरेको संसद् सचिवालयले जनाएको छ । स्रोतका अनुसार सामाजिक न्याय तथा मानवअधिकार समितिको सभापतिको हैसियतमा सरकारी गाडी प्रयोग गर्दै आएका राप्रपाका श्रेष्ठ हाल गृहजिल्ला महोत्तरीतिर छन् ।

याे पनि पढ्नुस  हिमाल शर्माको निर्वाचन सभामा योगेश भट्टराईले सम्बोधन गर्ने

निजी गाडी चढ्छन् शीर्ष नेता
प्रतिनिधिसभा निर्वाचनमा उम्मेदवारी दिएका सरकारमा सहभागी विभिन्न दलका शीर्ष नेताहरू भने निजी गाडी प्रयोग गरिरहेका छन् । कांग्रेस सभापतिसमेत रहेका प्रधानमन्त्री शेरबहादुर देउवा, उपप्रधानमन्त्रीहरू गोपालमान श्रेष्ठ, कृष्णबहादुर महरा, विजयकुमार गच्छदार, कमल थापाले चुनाव प्रचारका लागि निजी तथा भाडाका गाडी प्रयोग गरेका छन् ।

माओवादी केन्द्रबाट सरकारमा सहभागी विनाविभागीयमन्त्रीहरू जनार्दन शर्मा, टेकबहादुर बस्नेत, शिवकुमार मण्डललगायतले निजी सवारीसाधन प्रयोग गरिरहेका छन् । त्यस्तै, भौतिक पूर्वाधारमन्त्री वीरबहादुर बलायर, कानुनमन्त्री यज्ञबहादुर थापा, वाणिज्यमन्त्री मीन विश्वकर्मा राज्यमन्त्रीहरू नरबहादुर चन्द, डिल्ली चौधरीलगायतले पनि भाडाका सवारीहरू प्रयोग गरिरहेका छन् ।

संसद्का गाडी पनि दुरुपयोग
संसद् विघटन भएको एक महिना बितिसक्दा पनि पूर्वउपसभामुख गंगाप्रसाद यादवले संसद् सचिवालयबाट सुविधामा लिएको गाडी फिर्ता गरेका छैनन् । सरकारी गाडी चढेर उनी गृहजिल्ला सप्तरीमा वाम गठबन्धनको प्रचार गरिरहेका छन् ।

याे पनि पढ्नुस  प्रदेश नं ७ मा निर्वाचन पछि सारेपछि मतदाता निराश

राप्रपा नेता सुशीलकुमार श्रेष्ठले पनि संसदीय समितिको सभापतिका हैसियतमा सचिवालयबाट लिएको बा.१झ ८४९६ गाडी फिर्ता गरेका छैनन् । उनले सरकारबाट पनि बा.१झ ५२०९ नम्बरको गाडी लिएका छन् ।

तत्कालीन लोकतान्त्रिक फोरमको प्रमुख सचेतकको हैसियतमा सचिवालयको गाडी लिएका योगेन्द्रप्रसाद चौधरीले पनि अझै फिर्ता गरेका छैनन् । उनी गृहजिल्ला दाङमा चुनाव प्रचारमा छन् ।

त्यस्तै, माओवादी केन्द्रकी सचेतकको हैसियतमा पाएको सुविधाको गाडी सीता नेपालीले पनि फिर्ता गरेकी छैनन् । उनी गृहजिल्ला सुर्खेतमा चुनाव प्रचारमा छिन् ।

पदको दुरुपयोग गर्ने मन्त्रीलाई कारबाही : आयोग
निर्वाचन आयोगले सरकारी गाडी चढेर चुनाव प्रचारमा जाने मन्त्रीमाथि कारबाही हुने बताएको छ । सरकारी गाडी चढेर निर्वाचन प्रचारमा गएमा आचारसंहिता उल्लंघन हुने आयोगका प्रवक्ता नवराज ढकालले बताए । ‘सरकारी कामकाजका लागि उहाँहरूले सरकारी गाडी प्रयोग गर्न पाउनुहुन्छ, तर चुनाव प्रचारप्रसारमा हिँड्दा प्रयोग गर्न पाउनुहुन्न । चुनाव प्रचारमा सरकारी गाडीको प्रयोग गरेको पाइए निर्वाचन आचारसंहिता उल्लंघन गरेको ठहर गरी कारबाही गरिनेछ,’ उनले भने । बहालवाला मन्त्रीमध्ये अधिकांश हाल चुनाव प्रचारका लागि उपत्यकाबाहिर छन् ।

कमेन्ट गर्नुहोस्