प्रहरीमाथि गोली प्रहार गर्ने तीन पक्राउ

धनुषा, मंसिर ११ । प्रहरीमाथि गोली प्रहार गरेर फरार भएका तीन जनालाई धनुषा प्रहरीले आज पक्राउ गरेको छ ।

पक्राउ पर्नेमा धनुषाको शहीदनगर नपा–१ बस्ने ३२ वर्षीय शिवकुमार राय, २८ वर्षीय मनोजकुमार राय र १८ वर्षीय सुरेन्द्रकुमार राय छन् । जिल्ला प्रहरी कार्यालय धनुषाका अनुसार शहीदनगर नपा–२ स्थित चिरैया चोकबाट तिनलाई पक्राउ गरिएको हो ।

अभियुक्तका साथबाट ज६प ९०५६ र स५प ९२३९ नंका दुई थान मोटरसाइकल, १५० ग्राम ब्राउन सुगर, एक थान चिनियाँ पेस्तोल र त्यसमा लाग्ने म्यागजिन एक तथा मोबाइल र सिम कार्ड तीन थान बरामद गरिएको छ । अभियुक्तहरु आइतबार अपराह्न २ बजे सिरहाको कल्याणपुर नपा–५ स्थित निर्दनाघाटमा प्रहरी जाँच भइरहेका अवस्थामा मोटरसाइकलमा आएर त्यहाँ खटिएको प्रहरी टोलीमाथि गोली प्रहार गरी एक म्यादी प्रहरी र एक प्रहरी जवानलाई गम्भीर घाइते बनाई फरार भएका थिए ।

गोली प्रहारबाट ३३ वर्षीय प्रहरी जवान मायाराम यादव र म्यादी प्रहरी आदर्श कुँवर घाइते भएका छन् । उनीहरु दुवैको शिक्षण अस्पताल महाराजगञ्जमा उपचार भइरहेको प्रहरीले जनाएको छ । अभियुक्त तीनै जनालाई जिप्रका धनुषाको हिरासतमा राखी लागुऔषध, हातहतियार तथा ज्यान मार्ने उद्योग मुद्दामा म्याद थप गराई आवश्यक अनुसन्धान भइरहेको छ ।

कमेन्ट गर्नुहोस्

%d bloggers like this: