अनुदान लिएका २० हजारले अझै घर बनाएनन्

नुवाकोट / रासस– विनाशकारी भूकम्पले क्षति पुगेको आवासमध्ये यहाँका दुई तिहाइ प्रभावितले मात्र घर निर्माण गरिरहेका छन् । अनुदान लिएकामध्ये २० हजार भूकम्पपीडितले घर बनाएका छैनन् ।

जिल्ला आयोजना कार्यान्वय एकाइका अनुसार प्रभावितमध्ये गत शुक्रबारसम्म ४४ हजार ४८५ परिवारले जग बसालेर घर निर्माण सुरु गरेका छन् । जिल्लाका ६९ हजार २८९ परिवार लाभग्राहीमध्ये सरकारी अनुदान प्रक्रियामा समावेश हुन प्राविधिक सहयोग लिएर घर निर्माण गर्ने लाभग्राहीको संख्या दुई तिहाइभन्दा बढी पुगेको इकाइ प्रमुख विदुर खड्काले जानकारी दिएका छन् ।

याे पनि पढ्नुस  धरहरा पुनःनिर्माणका लागि छलफल शुरु

प्रमुख खड्काका अनुसार ४१ हजार २२५ परिवारले घरको जग तहसम्म निर्माण गरी दोस्रो किस्ता अनुदान लिन निवेदन दिएकामध्ये ४१ हजार ७९४ योग्य ठहरिएका छन् । ‘६४ हजार ५३ लाभग्राहीले भूकम्प प्रतिरोधात्मक आवास निर्माण गर्ने सम्झौता गरी पहिलो किस्ताबापत ५० हजार अनुदान लिएका छन्,’ उनले भने, ‘घर बनाउन भनी पहिलो किस्ता लिएकामध्ये अझै २० हजार परिवारले घर बनाउन सुरु गरेको देखिन्न ।’ पुनर्निर्माण प्राधिकरणले यही चैत मसान्तभित्र घरको जग तह निर्माण गर्नेलाई मात्र अनुदान उपलब्ध गराउने जनाएको छ । ‘सरकारी निर्णयका आधारमा २० हजार परिवार अनुदान सुविधाबाट वञ्चित हुन सक्ने जोखिम छ,’ उनले भने ।

याे पनि पढ्नुस  भत्किएका ४० प्रतिशत घर निर्माण भएको प्राधिकरणको दावी

आवास निर्माणका लागि निर्माण सामग्री सहज नहुनु, दक्ष कामदारको अभाव, प्राविधिक जानकारी पाउन भन्झटिलो व्यवस्था, बजार क्षेत्रमा सडकले दायाँबायाँ ओगट्ने क्षेत्र स्पष्ट नहँुदा निजी आवास निर्माणमा अपेक्षाभन्दा ढिला भएको पुनर्निर्माण प्राधिकरण जिल्ला समन्वय समितिको सचिवालयका निमित्त प्रमुख वेदप्रसाद गौडेलले बताए । ‘४१ हजार ७९४ परिवार दोस्रो किस्ता अनुदानका लागि सिफारिस भएका छन्,’ गौडेलले भने, ‘आवास निर्माण सम्पन्न गरी तेस्रो किस्ताका लागि ५ हजार ४०८ परिवार मात्रै योग्य देखिएका छन् ।’ सरकारी तथ्यांकअनुसार कूल लाभग्राहीमध्ये तोकिएको मापदण्डअनुसार दोस्रो किस्ता पाउने लाभग्राही ६५ दशमलव १६ प्रतिशत छ भने तेस्रो किस्ता पाउने ८ दशमलव ४३ प्रतिशत मात्र छ । निर्माण सम्पन्न भएका १२ हजार ६५२ घरले तोकिएको मापदण्ड पूरा नगर्दा अनुदान सिफारिस रोकिएको एकाइले जनाएको छ ।

कमेन्ट गर्नुहोस्