जनताका आवश्यकता पूरा गर्न सरकार प्रतिबद्ध छ : प्रधानमन्त्री

लहान । प्रधानमन्त्री केपी शर्मा ओलीले जनताका आवश्यकता पूरा गर्न सरकार प्रतिबद्ध रहेको बताउनुभएको छ ।

विद्यार्थी भर्ना अभियानको क्रममा सिरहाको कल्याणपुर नगरपालिका ११ स्थित रामदुलारी माध्यमिक विद्यालयमा आज आयोजित विद्यालय भर्ना अभियान कार्यक्रमलाई सम्बोधन गर्दै प्रधानमन्त्री ओलीले भन्नुभयो, “जनताले नेतृत्वका लागि जनमत दिएर आफूहरूलाई पठाएको हो । अब हाम्रो मुख्य काम भनेकै जनताको सेवा गर्नु हो । त्यसप्रति हामी प्रतिबद्ध छौं ।”

अब कुनै नेपाली जनता खानाबिना र जाडोले कठ्यांग्रिएर मर्नु नपर्ने दाबी गर्दै उहाँले जनताले देखेको समृद्धिको सपना वर्तमान सरकारले पूरा गर्ने प्रतिबद्धतासमेत व्यक्त गर्नुभयो ।

याे पनि पढ्नुस  राष्ट्रिय सरसफाई वर्ष घोषणा गर्न प्रधानमन्त्री ओली सहमत, अभियन्तादेखि गायिकासम्मको माग

मुलुकको विकास र समृद्धिको मुख्य आधार शिक्षा भएको उल्लेख गर्दै उहाँले भन्नुभयो – “कुनै समय विद्वानहरूको क्षेत्र भनेर चिनिने मिथिला र मेधशमा अहिले शिक्षाको अवस्था नाजुक बनेको छ ।”

“दुनियाँमा शिक्षाको विकास नभएको बेला मिथिला र मेधशमा गग्री र अष्टवक्र जस्ता विद्वानहरू थिए,” उहाँले भन्नुभयो – “तर आज यहाँका ६१ प्रतिशत जनता अक्षर नचिन्ने छन् ।”

सुनकोसी र कमला नदीलाई डाइभर्सन गरी तराईको खेतीयोग्य जमिनमा सिँचाइ गर्ने र नपुग ठाउँहरूमा सौर्यबाट सिँचाइ गरी उन्नत तरिकाले कृषि उत्पादन गर्ने सरकारको योजना रहेको पनि उहाँले उल्लेख गर्नुभयो । प्रधानमन्त्री ओलीले अबको दिनमा खण्डेखेती प्रणालीलाई विस्थापन गरी सहकारीको माध्यम ‘प्लट सिष्टम’ अपनाउने सरकारको योजना रहेको बताउनुभयो ।

याे पनि पढ्नुस  प्रधानमन्त्रीले बिहीबार संसदमा सम्बोधन गर्ने

उहाँले हाम्रो विकासमा छिमेकी राष्ट्रहरूको समेत सहयोग रहने विश्वास व्यक्त गर्नुभयो ।

प्रधानमन्त्री ओलीले अब कुनै पनि सशस्त्र संगठनको नाममा जनतालाई आतंकित बनाउने, धम्क्याउने, अपहरण तथा चन्दा आतंक मच्चाउनेलाई सरकारले नछाड्ने बताउँदै अबका दिनमा शान्ति खलबल्याउने जुनसुकै समूहलाई कानूनी दायरामा ल्याउने दृढता व्यक्त गर्नुभयो ।

याे पनि पढ्नुस  प्रम ओलीको बोलीमा बलात्कृत ८ वर्षे बालिका र बोक्सीको आरोपमा पीडित युवती

कार्यक्रममा शिक्षामन्त्री गिरिराजमणि पोखरेलले दुई वर्षभित्र साक्षर मुलुक घोषणा गर्ने बताउनुभयो । ’

सोही क्रममा प्रदेश नं. २ का मुख्यमन्त्री लालबाबु राउतले २ नं प्रदेश भौगोलिकताको हिसाबले सुगम भएपनि मानव सूचकाँकमा हिमाली क्षेत्रभन्दा धेरै पछाडि रहेको बताउनुभयो ।

कार्यक्रममा प्रधानमन्त्री ओलीले रुपा कुमारी खत्बे र पवन मरिक डुमको अभिभावकत्व ग्रहण गर्नुभएको थियो । रासस

कमेन्ट गर्नुहोस्