५०-५० काे हैसियतमा एकता : प्रचण्ड

काठमाडौं, वैशाख १९ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले एमाले र माओवादीबीच समान हैसियतमा पार्टी एकता गर्न दुबै दलबीच समझदारी भइसकेको बताएका छन् ।

बराबरी हैसियतमा एकता गर्नुपर्ने माओवादी अडानमा एमाले सहमत नहुँदा एकतामा अन्योल बढेका बेला समान हैसियतमा एकता गर्न एमाले सहमत भएको प्रचण्डले बताएका हुन् ।

पार्टी मुख्यालय पेरिसडाँडामा बुधबार बसेको सचिवालयको बैठकलाई एकताका सन्दर्भमा भएका प्रगतिबारे ब्रिफिङ गर्दै प्रचण्डले ६० र ४० को आधारमा नभई समान हैसियतमा केहि दिनभित्रै एकता हुने बताए ।

एमाले नेतृत्व माओवादीको जनयुद्धलाई स्वीकार गर्न तयार भएको पनि प्रचण्डले बैठकमा बताएको एक नेताले बताए ।

त्यसैगरी, प्रचण्डले पार्टीको जिम्मेवार भूमिकामा रहेका कुनैपनि नेताहरु एकीकृत पार्टीमा उचित हैसियतमा रहने गरी व्यवस्थापन गर्न लागिएको अध्यक्षले बताएको बैठकपछि प्रवक्ता पम्फा भुसालले जानकारी दिइन् ।

भुसालका अनुसार प्रचण्डले बिहिबार नै एमाले अध्यक्ष केपी ओलीसँग मिल्न बाँकी रहेका विषयमा छलफल गर्ने बताइन ।

कमेन्ट गर्नुहोस्