गैंडाले आतंक मच्चायो, रातदिन गस्तीमा किसान

नवलपरासी, बैशाख २२ । पूर्वी नवलपरासीको गैंडाकोटका किसान गैंडाको आतंकले हैरान भएका छन् ।

विशेष गरी मध्यवर्ती क्षेत्रका बासिन्दा गैंडाको आतंकका कारण त्रसित हुने गरेका छन् । उनीहरुले रात दिन गैंडाको त्रासमा बाँच्नुपरेको गुनासो गरेका छन् ।

चितवन राष्ट्रिय निकुञ्जबाट आएका गैंडाले किसानले लगाएको मकै, उखु, केरा, तरकारीलगायतका बालीमा क्षति पुर्‍याउने गरेका छन् ।

गैंडाकोटलाई मकैको पकेट क्षेत्रको रुपमा स्थापित गर्ने उद्देश्यले मकै खेती सुरु गरेको किसान अव गैंडा आतंकका कारण विस्तापित हुनुपर्ने अवस्था आएको बताउँछन् ।

निकुञ्जबाट आएका गैंडाले किसानले लगाएको वाली खाएर नष्ट गर्ने गरेका छन् ।

रातीको समयमा ४/५ वटा गैंडा एकैसाथ गाउँमा पस्ने गरेका छन् । गैंडा धपाउन यहाँका बासिन्दा रातदिन समूह बनाएर बस्ने गरेका छन् ।

गैंडाको आतंकबाट सबैभन्दा बढी गैंडाकोटको वडा नं. ६, ७, ८ र ९ का बासिन्दा प्रभावित छन् ।

गैंडा नियन्त्रणका लागि नगरपालिकालगायत सम्बन्धित निकायलाई पटकपटक आग्रह गर्दा पनि सुनुवाई नभएको स्थानीयको गुनासो छ ।

नगरपालिकाले भने गैंडा नियन्त्रणका लागि प्रयास गरिरहेको जनाएको छ ।

गैंडाकोट नगरपालिकाकी उपमेयर विष्णुकुमारी कँडेलले केन्द्रबाटै सहयोग लिएर भए पनि गैंडा नियन्त्रणको दीर्घकालीन उपाय अबलम्बन गरिने बताइन ।

चितवन राष्ट्रिय निकुञ्जले हात्तीको प्रयोग गरेर गैंडा धपाउने गरेको छ । तर त्यो दीर्घकालीन समाधान होइन ।

केन्द्रीय सरकारले नै गैंडा नियन्त्रणका लागि प्रभावकारी उपाय अबलम्बन नगर्ने हो भने गैंडाकोटका धेरै किसान विस्थापित हुने देखिएको छ ।

कमेन्ट गर्नुहोस्