काश्मीरमा आतंकारी समूह हिजबुल मुजाहिदीनका प्रमुखसहित प्राेफेसर मारिए

काश्मीर, वैशाख २३ । जम्मू–कश्मीरको शोपिया जिल्लाको बाडिगाम क्षेत्रमा भारतीय सुरक्षा बलले आइतबार पाँच आतंकारीलाई मारिदिएको छ । सुरक्षा बलले यो पछिल्लो समय हात पारेको सबैभन्दा ठूलो सफलता भएको दाबी गरेको छ ।

उनीहरुका अनुसार मृत्यु हुनेमा आतंकारी समूह हिजबुल मुजाहिदीनका शीर्षनेताहरु समेत रहेको दाबी छ । सुरक्षा बलसँगको मुठभेडमा हिजबुल कमाण्डर सदाम पद्दार र उनका दुई साथी बिलाल मौलवी र आदिल समेत पाँच आतंकारी मारिएको बताइएको छ ।

मृत्यु हुनेमा भर्खरै कश्मीर यूनिवर्सिटीको प्रोफेसरबाट राजीनामा दिएर आतंकवादी समूहमा प्रवेश गरेका मोहम्मद रफी पनि रहेको सुरक्षा बलले दाबी गरेको छ । एक जनाको भने अहिलेसम्म पहिचान हुन सकेको छैन ।

सदाम पद्दार मुजाहिदीनको शीर्ष कमाण्डर भएको र उनी बुरहान वानी ब्रिगेडका एकमात्र जीवित हिज्बुल कमाण्डर थिए । यो मुठभेडमा २ जना सुरक्षाकर्मी घाइते भएको छन् । घाइते मध्ये एक जना सेना र एक जना प्रहरी भएका बताइएको छ ।

प्रशासनले सुरक्षालाई मध्यनजर गर्दै दक्षिण कश्मीरमा मोबाइल र इंटरनेट सेवा बन्द गरेको छ । एक प्रहरी अधिकारीका अनुसार शोपिया जिल्लाको जैनापुरा क्षेत्रमा बडीगाम गाउँमा आतकारीले सेल्टर लिई रहेको सूचनाका आधारमा सुरक्षा कारबाही गरिएको थियो । सुचना पाए लगत्तै सुरक्षा बलले आइतबार विहान नै उत्त क्षेत्रलाई घेराबन्दी गरी खानतलासी शुरु गरेको थियो ।

कमेन्ट गर्नुहोस्