ट्रम्प र किमबीच भेटघाटको समय र स्थान सार्वजनिक

अमेरिकी राष्ट्रपति डोनल्ड ट्रम्पले उत्तर कोरियाली नेता किम जङ-उनसँग आफूले जुन १२ मा सिंगापुरमा भेट्न लागेको बताएका छन्।

किमलाई भेट्ने निम्तो स्वीकार गरेर ट्रम्पले गत एप्रिलमा विश्वलाई आश्चर्यचकित तुल्याएका थिए।

त्यसअघि एकअर्काको आलोचना, आरोप-प्रत्यारोप र उपहास गर्ने गरेका यी दुई नेताको भेटमा विश्वको आँखा रहेको छ ।

उत्तर कोरियाली नियन्त्रणबाट मुक्त भएका तीन अमेरिकी बन्दीलाई आफूले स्वागत गरेको केही घण्टामा ट्रम्पले त्यस्तो घोषणा गरेका हुन्।

अमेरिकी विदेशमन्त्री माइक पोम्पेओको प्योङ्याङ भ्रमणका क्रममा उनीहरूलाई मुक्त गरिएको थियो।
ट्रम्प र किमबीचको भेटवार्ताका विषयबारे छलफल गर्न पोम्पेओ त्यहाँ पुगेका थिए

यसअघि पनि सिंगापुरमा यस्ता उच्चस्तरका कूटनीतिक भेटवार्ता हुँदै आएको थियो।

सन् २०१५ मा चीन र ताइवानले पनि सिंगापुरमा ऐतिहासिक वार्ता गरेका थिए।

हाल सिंगापुरको अमेरिका र उत्तर कोरिया दुबैसँग निकटतम सम्बन्ध रहेको छ ।
सिंगापुरको उत्तर कोरियासँग कूटनीतिक सम्बन्ध राखिरहेको छ।
अन्तर्राष्ट्रिय प्रतिबन्धहरू कडा तुल्याइँदा अन्य मुलुकले उत्तर कोरियासँग व्यापार गर्न बन्द गरेपनि सिंगापुरले भने त्यसो गरेको थिएन।
बिबिसी

कमेन्ट गर्नुहोस्