प्रधानमन्त्री मोदीको पशुपतिमा विशेष पूजा, आगन्तु पुस्तिकामा यस्तो लेखें

काठमाडौं, वैशाख २९ । नेपालको राजकीय भ्रमणमा रहनुभएका भारतका प्रधानमन्त्री नरेन्द्र मोदी आज पाशुपत क्षेत्र जानु भई हिन्दूहरुको आस्थाको केन्द्र आराध्यदेव पशुपतिनाथ मन्दिरमा विशेष पूजाआजा एवं दर्शन गर्नुभयो ।

मुक्तिनाथमा पूजा एवं दर्शनपछि प्रधानमन्त्री मोदी पशुपतिनाथ आइपुग्नु भएको थियो । पशुपतिनाथ मन्दिर परिसरमा उहाँलाई संस्कृति, पर्यटन तथा नागरिक उड्ययनमन्त्री एवं पशुपति क्षेत्र विकास कोष सञ्चालक परिषद्का अध्यक्ष रवीन्द्र अधिकारीले स्वागत गर्नुभएको थियो ।

उहाँको स्वागतमा कोषका सदस्य सचिव डा प्रदीप ढकाल, कोषाध्यक्ष डा मिलनकुमार थापा, कोष सञ्चालक परिषद्का सदस्य, कोषका कर्मचारीलगायत श्रद्धालु भक्तजनको उपस्थिति थियो ।

भारतीय प्रधानमन्त्री मोदीले पूजा आजा एवं दर्शनका क्रममा मन्दिर परिसरमा ५० मिनेट बिताउनुभएको थियो । प्रधानमन्त्री मोदीलाई नेपाल वेद विद्याश्रमका १०८ ब्राह्मण बटुकले स्वस्तिवाचन सहित मूल मन्दिरभित्र स्वागत गरेका थिए ।

उहाँले पशुपति दर्शन विधिअनुसार पशुपति परिसरका मन्दिरको दर्शन एवं पूजा गरी मूल मन्दिरमा वैदिक रुद्राभिषेकसहित विशेष पूजा गर्नुभयो । मन्दिरका मूल भट्ट गणेश भट्टले पूजा गराउनुभएको थियो ।

पूजापछि सञ्चारकर्मीसँग प्रतिक्रिया दिनुहुँदै मन्त्री अधिकारीले मन्दिर परिसरमा भारतीय प्रधानमन्त्री मोदीले विशेष पूजा गर्नुभएको जानकारी दिनुभयो ।

मोदीले यसअघि २०७१ साउन १८ गते सोमबार पशुपतिनाथ मन्दिरमा रुद्राभिषेकसहित विशेष पूजा गर्नुभएको थियो ।

त्यसबेला पूजापछि उहाँले पशुपति मूल मन्दिरको जीर्णोद्धारका लागि भारतीय रुपैयाँ रु २५ करोड, सरसफाइका लागि रु पाँच करोड सहयोग घोषणा गर्नुभएको थियो ।

मोदीले  पुस्तिकामा भनेका छन्, ‘म नेपाल र भारतका सबै नागरिकको जीवनमा शान्ति, प्रगति र समृद्धिको कामना गर्छु ।’

पशुपतिनाथमा प्राथना गर्नका लागि व्यवस्था गरिदिएकोमा मोदीले पशुपति क्षेत्र विकास कोष र नेपाल सरकारसँग आभार समेत व्यक्त गरेका छन् ।

‘भारत सरकारको सहयोगमा पशुपतिनाथ परिसरमा निर्माधिन धर्मशालाले श्रद्धालुहरुलाई सुविधा प्रदान गर्ने छ भन्नेमा मलाई आशा छ’, मोदीले पुस्तिकामा लेखेका छन् ।

शुक्रबार जनकपुरस्थित रामजानकी मन्दीरमा पनि उनले लामै अनुभव आगन्तुक  पुस्किामार्फत साटेका थिए।

कमेन्ट गर्नुहोस्