क्वाटर फाइनलका लागि आज अन्तिम प्रतिस्पर्धा, को-कोबीच हुँदैछ भिडन्त ?

मस्को । रसियामा जारी विश्वकप फुटबल अन्तर्गत आज (मंगलबार) पनि दुई खेल हुनेछन् । प्रि-क्वाटर फाइनल अन्तर्गत आज अन्तिम दुई खेल हुनेछन्।

स्वीडेन भर्सेस स्वीट्जरल्याण्ड

अन्तिम ८ प्रवेशका लागि आज पहिलो खेल स्वीडेन र स्वीट्जरल्याण्डबीच हुने छ । यी दुई टिमबीचको खेल सेन्ट पिटर्सबर्ग रंगशालामा नेपाली समय अनुसार साँझ ७ः४५ बजे हुँदैछ ।

स्वीडेनले पहिलो खेलमा दक्षिण कोरियालाई १-० ले हराएको थियो, भने दोस्रो खेलमा भने जर्मनीसँग २-१ ले हारेको थियो । स्वीडेनले तेस्रो खेलमा मेक्सिकोमाथि ३-० को शानदार जित निकालेको थियो ।

यता, स्वीट्जरल्याण्ड भने पहिलो खेलमा ब्राजिलसँग १-१ को बराबरीमा रोकिएको थियो । उसले दोस्रो खेलमा सर्बियालाई २-१ ले हराएको थियो । तेस्रो खेलमा भने कोस्टारिकासँग २-२ को बराबरीमा रोकिएको थियो ।

कोलम्बिया भर्सेस इंग्ल्याण्ड
आजै हुने दोस्रो खेलमा अन्तिम आठका लागि कोलम्बिया र इंग्ल्याण्ड भिड्ने छन् । यी दुई टोलीको भिडन्त नेपाली समय अनुसार आज राती ११ः४५ बजे हुने छ । यी दुई टिमबीचको खेल निकै कडा रहने अपेक्षा गरिएको छ ।

खेल मस्कोमा रहेको स्पार्टक रंगशालामा हुनेछ । इंग्ल्याण्ड समूह ‘जी’ को उपविजेता तथा कोलम्बिया समूह ‘एच’ को विजेताको रुपमा अन्तिम ८ मा आएका हुन् । पहिलो खेलमा ट्युनिसियालाई २-१ तथा दोस्रो खेलमा पानामालाई ६-१ ले हराएको इंग्ल्याण्ड समूह चरणको अन्तिम खेलमा बेल्जियमसँग १-० ले पराजित भएको थियो ।

कोलम्बिया भने पहिलो खेलमा जापानसँग २-१ ले हारेको थियो । उसले दोस्रो खेलमा पोल्याण्डलाई ३-० तथा तेस्रो खेलमा सेनेगललाई १-० ले हरायो । मंगलबारको खेलपछि विश्वकपमा क्वाटरफाइनल समिकरण पूरा हुनेछ ।

अहिलेसम्म अन्तिम ८ मा पुग्ने टिमः फ्रान्स, उरुग्वे, रुस, क्रोएसिया, ब्राजिल र बेल्जियम


अन्तिम १६ बाट बाहिरीने टिमः अर्जेन्टिना, पोर्चुगल, स्पेन, डेनमार्क, मेक्सिको र जापान

-एजेन्सी

कमेन्ट गर्नुहोस्