१२ वर्षपछि इंग्ल्याण्ड अन्तिम आठमा, ह्यारी केनको नयाँ रेकर्ड

मस्को । रसियामा जारी विश्वकप फुटबल अन्तर्गत मंगलबार भएको प्री-क्वाटरफाइनलको अन्तिम खेल इंग्ल्याण्डले जितेको छ । उसले ट्राइबेकरमा कोलम्बियालाई पराजित गरेको हो । योसँगै क्वाटरफाइनलको समिकरण पूरा भएको छ । इंग्ल्याण्ड १२ वर्ष पश्चात अन्तिम आठमा पुग्न सफल भएको हो ।

कोलम्बियालाई ४-३ ले पराजित गरेको इंग्ल्याण्डले अन्तिम आठमा स्वीडेनको सामना गर्ने छ । इंग्ल्याण्डको जीतका लागि ह्यारी केन, मार्कोस ¥यासफर्ड, केइरन ट्रिपियर, इरिक डायरले गोल गरे । जोर्डन ह्यान्डर्सनको प्रहार भने कोलम्बियाका गोल रक्षकले रोकेका थिए ।

कोलम्बियाका राडामेल फल्कायो, जुवान क्वाड्राडो, लुइस मुरिलले गोल गरेपनि कार्लोस बाक्काको पेनाल्टी पोलमा लाग्यो भने मेट्युस युरिबको इंग्ल्याण्डका गोल रक्षकले रोकेका थिए ।त्यसअघि निर्धारित समयकै अतिरिक्त तेश्रो मिनेटमा कोलम्बियाका यारिमिनाले गोल गर्दै खेल बराबरी गरे ।

उनको गोलसँगै खेल अतिरिक्त समयमा धकेलिएको थियो । निर्धारित समयमा खेलको नतिजा नआएपछि ३० मिनेट अतिरिक्त समयमा दुवै टोलीबाट गोल हुन सकेन । त्यसपछि खेल टाइब्रेकरमा पुगेको हो । खेलको ५७ औं मिनेटमा ह्यारी केनको गोलमा कोलम्बियाविरुद्ध इंग्ल्याण्डले अग्रता लिएको थियो ।

रुसमा जारी विश्वकप फुटबल अन्तर्गत अहिले भैरहको प्रि–क्वाटरफाइनलको अन्तिम खेलमा केनले पेनाल्टी मार्फत गोल गरेका हुन् । केनलाई कोलम्बियाका खेलाडीले डिबक्समा लडाएपछि इंग्ल्याण्डले ५७ औं मिनेटमा पेनाल्टी पायो । यो विश्वकपमा केनले सर्वाधिक ६ गोल गरेका छन् ।

मस्कोमा रहेको स्पार्टक रंगशालामा समूह एच को विजेता कोलम्बियाले समूह जी को उपविजेता इंग्ल्याण्डलाई अन्तत रोक्न सकेन । पहिलो खेलमा ट्युनिसियालाई २-१ तथा दोस्रो खेलमा पानामालाई ६-१ ले हराएको इंग्ल्याण्ड समूह चरणको अन्तिम खेलमा बेल्जियमसँग १-० ले पराजित भएको थियो । -एजेन्सी

कमेन्ट गर्नुहोस्