ब्रिटिश गोर्खा: नेपाली महिला भर्तीबारे बढ्दो चासो

काठमाडौं, साउन ४ । नेपाली महिलाहरूलार्इ ब्रिटिश सेनामा भर्ना लिने खबर सार्वजनिक भएसँगै कतिपय युवतीहरूले त्यसप्रति चासो देखाउन थालेका छन्।

एघार वर्षअघि बेलायती सेनामा भर्ना लिने चर्चा चलेपछि धरान १५ की टिम्पल लिम्बुले भर्ना हुनका लागि तयारी तालिम गरिन्। तालिमपछि उनी र उनका श्रीमान्‌ले धरानमा पुरुषहरुका लागि ब्रिटिश सेनामा भर्ती हुनका लागि तयारी शारीरिक अभ्यास तालिम केन्द्र खोलेका छन्।

महिलालार्इ भर्ती लिने खबर थाहा पाएका टिम्पलका चिनजानका युवतीहरूले फोन गरेर तालिमका लागि जानकारी लिइरहेका छन्।आगामी सन् २०२० देखि महिलाहरू पनि ब्रिटिश सेनामा भर्ना हुन पाउने खबर सुनेर टिम्पललाई खुशी लागेको छ।

उनले भनिन्, ‘मेरो त उमेर गयो। यस्तो खालको अवसर छोरालार्इ मात्र दिने चलन छ। यो हटाउनु पर्छ। छोरीहरूले पनि यो अवसर पाएमा परिवारका लागि केही गर्ने मौका पाउँछन्।’

ब्रिटिश सेनामा महिलाहरूलार्इ पनि भर्ती लिने खबर ११ वर्षअघि पनि चलेको थियो। खबरसँगै बेलायती सेनामा भर्नाका लागि शारीरिक अभ्यास तालिम लिन पूर्वी पहाडी जिल्लाबाट करिब १५० भन्दा बढी महिलाहरू एकै साथ धरानमा तालिम लिएका थिए । त्यसमा टिम्पल लिम्बु पनि सहभागी थिइन ।

उनले भनिन्, ‘हामी महिलालार्इ पनि सेनामा भर्ती हुने अवसर आयो भन्दा खुशी लाग्यो। गर्दै गरेको नोकरी पनि छोडेर तालिम लिन आएँ। कमार्इ राम्रो हुने परिवार र आफ्नो भविष्य पनि सुरक्षित हुने आशाले सेना जाने निर्णय गरेको थिए।’

तालिमका क्रममा महिलाहरूले सिट-अप, पुश-अप, दौडसँगै सैनिक शिक्षाको अभ्यास गरेको लिम्बुले बताइन्। शारीरिक अभ्यास तालिम निकै कठिन भयो। त्यसमध्ये पनि टिम्पललार्इ हेभिङ गर्न भने निकै गाह्रो भयो।

यस्तो कठिनाइ भोग्दा बेलायती गोर्खा सैनिकमा भर्ना हुनका लागि पुर्खाहरूले र केटाहरूले कति धेरै दुख गरेका रहेछन् भन्ने महसुस भएको टिम्पलले बताइन्।

यसरी शारीरिक अभ्यास गरिरहँदा उनीहरूलार्इ हेर्ने मानिसको भिड लाग्थ्यो। टिम्पलले भनिन्, ‘केटीहरू पनि कुदेको हेर। ल, बुहारीहरू सबै लाहुरे हुने भए छोराहरूले को ल्याउने भन्दै बुढापाकाहरूले हामीहरूलार्इ जिस्क्याउँथे।’

महिलाहरूले ब्रिटिश सेनामा भर्ना हुने चर्चा चलेसँगै तयारी पनि गरे। तर उनीहरूलार्इ छनोट प्रक्रियामा समावेश गराइएन। भर्ना नलिएपछि आफूसँगै तालिममा सहभागी सबै साथीहरू निरास भएको टिम्पलले बताइन्।

उनले भनिन्, ‘अभिभावकले छोरीहरूलार्इ बाहिर निस्कन हुँदैन। यस्तो तालिमहरू लिनुहुँदैन भन्ने चलन छ। त्यत्रो खर्च गरेर गएका थियौं। कति दुख गरियो। पसिना धेरै बगाइयो तर पछि नलाने भनेको सुनेपछि धेरै रोएका थियौं। त्यो सम्झँदा अझै पनि नराम्रो लाग्छ। रुन आउँछ।’

ब्रिटिश सेनामा भर्ती हुनका लागि धरानमा करिब ३० वटा भन्दा बढी पूर्व तयारी तालिम केन्द्र सञ्चालनमा छन्। प्रदेश १ र पश्चिम नेपालका युवाहरू धरानमा तालिम लिन आउने तालिम केन्द्रहरूले जानकारी दिएका छन्।

कमेन्ट गर्नुहोस्