Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

३ करोडको लगानीमा भीमदत्तनगरमा धर्मशाला

कञ्चनपुर, साउन २४ । भीमदत्तनगरपालिका–९ ब्रह्मदेवमा रहेको सिद्धनाथ मन्दिर संरक्षण समितिले रु तीन करोडको लागतमा सो मन्दिरमा धर्मशाला निर्माण गरेको छ ।

मन्दिरमा सङ्कलित रकमले प्रसिद्ध सिद्धनाथ मन्दिर परिसरमा दर्शनार्थीका लागि सुविधा सम्पन्न धर्मशाला निर्माण गरिएको हो । चार वर्षअघि निर्माण कार्य प्रारम्भ गरिएको धर्मशालामा दर्शनार्थी बस्नका लागि ११ कोठा, एक हल, शौचालय र स्नान घर निर्माण गरिएको छ ।

प्राचीन सिद्धनाथ मन्दिरमा दर्शन गर्न आउने भक्तजनले चढाएको रकम सङ्कलन गरी धर्मशाला निर्माण गरिएको समितिको कार्यालय प्रमुख गोविन्द महताले बताए । धर्मशाला निर्माणको सबै कार्य यस वर्ष पूरा हुने उनको भनाइ छ ।

आर्यघाटका लागि जग्गा दान

मन्दिर, विद्यालय तथा खेल मैदानका लागि प्रायः जसो जग्गादान गर्ने गरेको पाइन्छ तर दaक्षिणी क्षेत्रअन्तर्गत एक स्थानीयले शव दाह गर्ने आर्यघाटका लागि जग्गा दान गरेका छन् ।

पुनर्वास नगरपालिका–१० विकास बस्तीका स्थानीय समाजसेवी मीनबहादुर देउवाले करीब रु सात लाख मूल्य पर्ने पाँच कट्ठा जग्गा शव जलाउने आर्यघाटका लागि निःशुल्क रूपमा दान गरे ।

देउवा परिवारले आर्यघाटका लागि जग्गा दान गरेपछि स्थानीय बासिन्दालाई शव जलाउन सहज भएको छ । देउवाद्वारा आर्यघाटका लागि जग्गा प्राप्त गरेपछि पुनर्वास नगरपालिकाले शव जलाउने थलो, खानेपानी धारा, करीब ३०० जना मलामी विश्राम गर्ने पक्की टहरो निर्माण गरिएको छ ।

आर्यघाट निर्माण भएपछि पुनर्वासका वडा नं १ देखि ११ सम्म का स्थानीय लाभावान्ति भएका छन् । आर्यघाटका लागि नगरवासी जनताले नगरपालिकामा समेत बारम्बार गुहार लाउँदै आइरहेका थिए ।

कामचलाउ आर्यघाटका रूपमा प्रयोग हुँदै आएको वडा नं १० स्थित दोंदा नदीको किनारमा रहेको देउवा परिवारको जग्गा उपलब्ध गराइदिन केही समाजसेवीले अनुरोध गरेपछि मीनबहादुर देउवाको नाउँमा रहेको पाँच कट्ठा जग्गा प्राप्त गर्न सकिएको कुरा समाजसेवी छविलाल खनियाले बताए ।

कमेन्ट गर्नुहोस्

%d bloggers like this: