सवारी चालक र सरकारबीच सहमति, आन्दोलनका सबै कार्यक्रम फिर्ता

काठमाडौँ — सरकार र स्वतन्त्र सवारी चालकबीच सहमति भएको छ ।

नयाँ ऐनमा संशोधन गर्न सरकार तयार भएपछि आन्दोलन स्थगित भएको हो ।

यसअघि ऐनमा चालकविरोधी प्रावधान भएको भन्दै स्वतन्त्र सवारी चालकहरुले आन्दोलन गरेका थिए ।

यो सहमतिको सवारी चालकहरुले स्वागत गरेका छन् भने सरकार झुकेको भन्दै सामाजिक सञ्चालमा आलोचना समेत भएको छ ।

सरकारका प्रतिनिधि र नेपाल स्वतन्त्र सवारी चालक संघर्ष समितिबीच भएका ८ बुँदे सहमतिपछि आन्दोलन फिर्ता लिएका हुन् । दुर्घटनामा मानवीय क्षति भए चालकलाई कडा कारबाही हुने लगायतका व्यवस्था भएको भन्दै त्यो व्यवस्था संशोधनको माग राखी चालकहरु ३ दिनदेखि आन्दोलनमा उत्रिएका थिए ।
शुक्रबार प्रधानमन्त्री तथा मन्त्रिपरिषद कार्यालयका सचिव केदारबहादुर अधिकारी, गृह सचिव प्रेम राई, भौतिक पूर्वाधार तथा यातायात मन्त्रालयका सचिव मधुसुदन अधिकारी र कानुन सचिव राजिव गौतमले उक्त सहमतिमा हस्ताक्षर गरेका हुन् । कानुन संशोधनका लागि पहल गर्ने, गाडी दुर्घटना भएमा चालकको लापरवाही रहे÷नरहेको छानबिन गर्न समिति गठन गर्ने, लगायतका सहमति भएको यातायात व्यवस्था विभागका महानिर्देशक लावण्य ढकालले जानकारी दिए ।

याे पनि पढ्नुस  आगामी आइतबार सार्वजनिक विदा

‘मन्त्रिपरिषदको कार्यालयमा सहमति भएको छ,’ उनले भने, ‘आन्दोलन फिर्ता गाडी सुचारु गरिसकेका छन् ।’

सहमति पछि सरकारले आन्दोलनका क्रममा पक्राउ परेका सबै चालकलाई रिहा गरेको छ । चालकहरुले पनि गाडी चलाउन थालेका छन् । यसअघि चालकहरुले गाडी नचलाउँदा लामो दूरीका यात्रुलाई समस्या परेको थियो । भदौ १ गतेदेखि लागू भएको नयाँ ऐन संशोधनको माग गर्दै आन्दोलनमा उत्रिएका गाडी चालकले आन्दोलन फिर्ता लिएका हुन् ।

कमेन्ट गर्नुहोस्