बन्द भएको करीब २ महिनापछि बिहीबारदेखि हवाई उडान शुरु

भोजपुर, असोज १८ । बन्द भएको करीब दुई महिनापछि बिहीबारदेखि नेपाल वायुसेवा निगमको हवाई उडान शुरु भएको छ ।

यसअघि भोजपुरबाट विराटनगर र काठमाडौँबाट उडान भर्दै आएको ट्वीनअटर जहाज मर्मतका लागि राखिएकाले साउन तेस्रो सातादेखि हवाइ सेवा बन्द भएको थियो ।

जहाजको मर्मत गरिएपछि निगमले नियमित सेवा शुरु गरेको छ ।

हवाई सेवा शुरु भएसँगै भोजपुर–काठमाडौँ सातामा शनिबार, मंगलबार, बुधबार, बिहीबार र शुक्रबार गरी ५ उडान तथा विराटनगरमा सातामा एकदिन (सोमबार) उडान हुने निगम भोजपुरका सहायक प्रमुख राजु मिजारले बताए ।

उडान सेवा पुनःसञ्चालन भएसँगै दशँैमा घर आउने तथा जाने यात्रुलाई सहज भएको छ । त्यस्तै उपचारका लागि भोजपुर अस्पतालबाट सुविधा सम्पन्न अस्पतालमा सिफारिश गरिएका बिरामीलाई पनि राहत मिलेको छ । रासस

कमेन्ट गर्नुहोस्