सानातिना विषय उधिनेर आपसी द्वन्द्व बढाउने समय होइनः प्रधानमन्त्री

काठमाडौं, कार्तिक २ । प्रधानमन्त्री केपी शर्मा ओलीले सानातिना विषय उधिनेर आपसी द्वन्द्व बढाउने समय नभएको जनाउँदै राष्ट्र निर्माणको ऐतिहासिक अवसरमा सम्पूर्ण नेपालीको एकता र साझा लक्ष्य अपरिहार्य भएकोमा जोड दिएका छन् ।

 

दसैंका अवसरमा शुभकामना सन्देश दिँदै उनले भने, ‘यस ऐतिहासिक अवसरलाई कुनै पनि हालतमा गुम्न दिनुहुँदैन भन्नेमा हामी हरेक क्षण सजग हुँदै आएका छौं । हामी आमजनताको विश्वास र अपेक्षालाई शिरोपर गर्दै समृद्ध नेपाल, सुखी नेपालीको लक्ष्य हासिल गर्न रत्तिभर समय खेर नफाली अघि बढ्न चाहन्छौं ।’

 

साथै, प्रधानमन्त्री ओलीले लामो राजनीतिक संघर्षको युग पार गरेर देशले विकास र समृद्धिको युगमा प्रवेश गरेको उल्लेख गर्दै संविधानले व्यवस्था गरेअनुसारका स्थानीय तह, प्रदेशसभा र संघीय संसद्को निर्वाचन सम्पन्न भएर जनप्रतिनिधिमूलक संस्थाहरु क्रियाशील भई देश राजनीतिक सङ्क्रमणकालको चरण पार गरेर सामाजिक–आर्थिक रुपान्तरणको बाटोमा लम्किसकेको जनाए ।

 

दसैं पर्वले नेपालको विविध भाषा, संस्कृति, परम्परा र विभिन्न स्थानमा रहेका नेपालीबीच भाइचारा, मेलमिलाप, सुसम्बन्ध कायम गर्ने माध्यम बनेको बताउँदै देशविदेशमा रहेका नेपालीमा हार्दिक शुभकामना व्यक्त गर्दै प्रधानमन्त्री ओलीले चाडपर्व सामाजिक र सांस्कृतिक पहिचान अभिव्यक्त गर्ने महत्वपूर्ण माध्यम भएको बताएका छन् ।

 

नेकपाका अध्यक्षसमेत रहेका प्रधानमन्त्रीले देशको सामाजिक तथा आर्थिक रुपान्तरणमा योगदान गर्न प्रेरणा प्राप्त हुने विश्वाससहित सामाजिक विकृति एवम् विसङ्गतीविरुद्धको विजय गर्न सक्ने क्षमता सबैमा प्रदान होस् भन्ने शुभकामना व्यक्त गरेका छन् ।

 

प्रधानमन्त्री ओलीले खुशियालीको पर्वका रूपमा रहेको विजयादशमीले सबैमा नयाँ उत्साह एवम् उमंग, जोश तथा जाँगर थप्दै समुन्नत नेपाल र सुखी नेपाली बनाउन प्रेरणा प्रदान गर्ने विश्वास व्यक्त गर्दै उत्तरोत्तर प्रगतिको कामना गरेका छन् । -रासस

कमेन्ट गर्नुहोस्