बागमतीमा बाइक दर्ता खुल्दै, अब बाइक लट नम्बर नै ३ अंकको !

काठमाडौं, कात्तिक ८ ।

बागमती अञ्चलमा रोकिएको मोटरसाइकल दर्ता प्रक्रिया नेपाल सरकारले फुकुवा गराउने भएको छ।

यातायात व्यवस्था नियमावलीमा मोटरसाइकलको लट संख्या दुई अंकको मात्र हुने व्यवस्था भएका कारण गत असोज १६ देखि बागमतीमा मोटरसाइकल दर्ता रोकिएको थियो ।

‘बा ९९ प ९९९९’ नम्बरसम्म दर्ता भइसकेपछि लट नम्बर १०० मा दुई पांग्रे दर्ता गर्न नियमावली बाधक भएकाले विभागले दर्ता रोकेको थियो । ‘नियमावलीको संशोधन प्रस्ताव मन्त्रिपरिषदले स्वीकृत गर्ने तयारी भइसकेकोे छ’, भौतिक पूर्वाधार तथा यातायात मन्त्री रघुवीर महासेठले भने– ‘संशोधित नियमावली एक–दुई दिनभित्रै राजपत्रमा प्रकाशित गरिने छ ।’

प्रत्येक लटमा १० हजार मोटरसाइकल दर्ता भएपछि लट परिवर्तन गरिन्छ ।

सोही अनुसार बागमती अञ्चलमा दर्ता पुगिसकेको छ । ‘अब लट नम्बर १०० नै भएर आउँछ, ३ अंकको लट नम्बर अब निरन्तर अघि बढ्छ’– विभागका प्रवक्ता गोकर्णप्रसाद उपाध्यायले जानकारी दिएको छ । नयाँपत्रिका दैनिकबाट

कमेन्ट गर्नुहोस्