पोखरा प्रिमियर लिगः लगातार तेस्रो खेलको हारसँगै सन्दीपको विराटनगर लगभग बाहिरियो

पोखरा कार्तिक १२ ।

पोखरा प्रिमियर लिगमा लगातार तेस्रो खेलमा हार बेहोरेसँगै सन्दीप लामिछानेको कप्तानीमा रहेको विराटनगर टाइटन्स प्रतियोगिताबाट लगभग बाहिरिएको छ।

सोमबार बिहान पोखरा रंगशालास्थित क्रिकेट मैदानमा भएको खेलमा विराटनगरलाई ज्ञानेन्द्र मल्लको काठमाडौं रोयल्सले ५ विकेटले पराजित गरेको हो ।

यसअघि विराटनगर घरेलु टोली पोखरा पल्टन र धनगढी ब्लुजसँग पराजित भएको थियो। प्रतियोगितामा रहिरहन अब उसले बाँकी दुई खेलमा जित निकाल्दै अन्य टोलीको नतिजामा भर पर्नुपर्ने स्थिती बनेको छ।

विराटनगरले दिएको एक सय ५० रनको लक्ष्य पछ्याएको काठमाडौंले चार बल बाँकी छँदै ५ विकेट गुमाएर भेटायो। काठमाडौंका गौरव तोमरले ६६, अमित श्रेष्ठले ३५ रन जोडे भने कप्तान ज्ञानेन्द्र मल्लले १७ रन बनाए।

विराटनगरका सहाब आलामले २ तथा किशोर महतो, सन्दीप लामिछाने र जितेन्द्र मुखियाले १(१ विकेट लिए।

त्यसअघि टस जितेर पहिले ब्याटिङ गरेको विराटनगरले निर्धारित २० ओभरमा ७ विकेट गुमाएर १ सय ४९ रन जोडेको थियो।

ओपनर मोहम्मद जहिद आलामले ४७ बलमा ४ छक्का र ७ चौका सहित ६७ रन बनाएपछि विराटनगर सो स्कोरमा पुगेको हो। यस्तै विराटनगरका सुनिल धमला र राजेशपुलामी मगर समान ३०(३० रनमा आउट भए ।

बलिङतर्फ काठमाडौंका सुशान भारी, बसन्त रेग्मी र गौरव तमोरले समान दुई दुई विकेट लिए। एजेन्सीको सहयोगबाट

कमेन्ट गर्नुहोस्