Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

साँघुरो सडकले यातायात व्यवस्थापनमा चुनौती

तुलसीपुर, मङ्सिर ३ ।

तुलसीपुर उपमहानगरपालिका अहिले यातायात व्यवस्थापनमा लागेको छ । पर्याप्त पार्किङको व्यवस्था नहुँदा र साँघुरो सडकका कारण यातायात व्यवस्थापन चुनौती बन्दै गएकाले प्रदेश सरकारले शुरु गरेको हर्न निषेध अभियानमा समेत चुनौती थपिएको छ ।

पाँच मिटरको बाटोमा ठूला सवारीका सधान, अटो रिक्सा, साइकल, भुसिया कुकुर, छाडा चौपाय र यात्रुका साथै बजारका मुख्य सडक वरपर सवारी सधान पार्किङले गर्दा भरिभराउ हुने गरेको छ । व्यस्त सडकका कारण व्यवसायी पनि आजित भएका छन् । मुख्य चोकको सडक किनारामा ट्राफिक प्रहरी र उपमहानगरपालिका–५ ले साना सवारी सधान पार्किङका लागि स्थान छुट्टाए पनि बाटो नै छेक्ने गरी पार्किङ गर्दा अन्य ठूला सवारीका सधान र यात्रुलाई समस्या हुँदै आएको छ । सडकपेटी पनि व्यवसायीले आफूखुशी प्रयोग गर्दा पैदल यात्रु कहाँबाट हिँड्ने भन्ने समस्या भएको छ ।

“बीच सडकमा ठूला गाडी गुडेका हुन्छन्, छेउमा साना सवारी साधान पार्किङ हुँदा हामी पैदल यात्रु कसरी हिँड्ने,” स्थानीयवासी चन्द्रबहादुर केसीको गुनासो थियो । त्यस्तै गाडी चालक र स्वयं ट्राफिक प्रहरीलाई पनि यो विषय टाउको दुखाइ भएको छ ।

“सडक छेक्ने गरी मोटरसाइकल पार्किङ हुन्छ, त्यसमा पनि छाडा चौपाया र पैदलयात्रुका कारण कसरी गाडी चलाउने भन्ने समस्या पर्दै आएको छ”, चालक पूर्ण वलीले भने । अभियान राम्रो भए पनि विकल्प नहुँदा निकै समस्या भएको उनको भनाइ थियो । पार्किङ निषेध क्षेत्र भनी होडिङ बोर्ड राखे पनि त्यसैको तल सवारी साधान पार्किङ गर्दा आफूहरुलाई सम्झाउनै समस्या भएको ट्राफिक प्रहरीहरू बताउँछन् ।

पछिल्लो समय भने वडा नं ५ र ट्राफिक प्रहरीले ट्राफिक व्यवस्थापन सुधार गर्दै लगेको छ । तुलसीपुर बजारमा हर्न बजाउनेलाई कारवाही गरिने भएको छ । एक वर्षअघि नै हर्न निषेध गरिए पनि त्यसको कार्यान्वयन नभएकामा अहिले कारवाही गर्ने नीति नै अघि सारिएको हो । उक्त वडाका जनप्रतिनिधि, प्रहरी तथा सरोकारवालाबीच भएको बैठकले बजार क्षेत्रमा अटेरी गरी हर्न बजाउने चालकलाई यही मङ्सिर १६ गतेदेखि कारवाही गर्ने निर्णय गरेको हो ।

त्यसअघि वडा कार्यालयले विभिन्न सचेतनामूलक अभियान सञ्चालन गर्ने वडाध्यक्ष वीरेन्द्रकुमार शाहले जानकारी दिए । बैठकले आइतबारदेखि १५ गतेसम्म विभिन्न स्थानमा चेतनामूलक होर्डिङ बोर्ड राख्ने, सूचना, पम्पलेट र प्रचारप्रसारको माध्यमबाट जानकारी गराउने निर्णय गरेको छ । उक्त निर्णयलाई अटेर गरी जथाभावी हर्न बजाउनेलाई कानूनअनुसार कारवाही गरिने उनले बताए । रासस

कमेन्ट गर्नुहोस्

%d bloggers like this: