लगानी मैत्री वातावरण निर्माणमा सरकार प्रतिबद्ध: मन्त्री बस्नेत

काठमाडौँ, मङ्सिर ७ । पछिल्लो तीन वर्षमा नेपालमा चिनियाँ लगानी ६ सय ३५ प्रतिशतले वृद्धि भएको छ । नेपालका लागि चिनियाँ राजदूत यु होङले वन तथा वातावरणमन्त्री शक्तिबहादुर बस्नेतसँगको भेटवार्तामा बताएकी हुन् ।

सिंहदरबारस्थित मन्त्रालयमा भएको भेटमा उनीहरुबीच नेपाल–चीन सम्बन्धका विविध पक्षबारे छलफल भयो । भेटमा मन्त्री बस्नेतले चीन नेपालको छिमेकी मात्र नभई असल साथी भएको बताए । नेकपाको सरकार बनेपछि नेपाल–चीन सम्बन्ध थप उचाइमा पुगेको उनको भनाइ थियो ।

‘नेपालमा दुई तिहाइको कम्युनिष्ट सरकार बनेपछि दुई देशबीचको सम्बन्ध थप उचाइमा पुगेको छ’, मन्त्री बस्नेतले भने, ‘चीन नेपालको छिमेकी मात्र होइन, असल साथी पनि हो । चीनको नेपालप्रतिको सकारात्मक नीति र व्यवहारको नेपाल सरकार र नेपाली जनता प्रशंसा गर्न चाहन्छौं ।’

याे पनि पढ्नुस  वन निगमको फाइल मन्त्रिपरिषदमा

मन्त्री बस्नेतले नेपालमा चिनियाँ लगानी आउने क्रम बढेकामा सन्तोष व्यक्त गर्दै लगानी मैत्री वातावरण निर्माणमा सरकार प्रतिबद्ध रहेको स्पस्ट पारे । लगानीसँगै नेपालमा चिनियाँ पर्यटकको संख्यामा समेत उल्लेख्य वृद्धि भएको र त्यसले दुई देशबीच कूटनीतिक मात्र नभई आर्थिक, सामाजिक र सांस्कृतिक सम्बन्ध पनि सुदृढ भएको उनको भनाइ थियो । ‘यो दुवै देशका लागि खुसीको कुरा हो’, मन्त्री बस्नेतले भने ।

मन्त्री बस्नेतले राजदूत होङको कार्यकालमा तीनवटै तहका निर्वाचन सम्पन्न भएको स्मरण गर्दै नेपाल र नेपालीको अप्ठेरा, चाहना र सम्भावना बुझेको कुटनीतिज्ञका रुपमा नेपाल र नेपालीले उनलाई स्मरण गरिरहने बताए । मन्त्री बस्नेतले बाँसजन्य उद्योग र जडिबुटीको उत्पादन तथा प्रशोधनका लागि नेपालले चीनसँग सहकार्य गर्ने र त्यसका लागि सकारात्मक वातावरण बनेको चर्चा गरे ।

याे पनि पढ्नुस  खानेपानी मन्त्रीद्वारा शुक्लाफाँटा आरक्ष पीडितको व्यवस्थापन गर्न वन मन्त्रीको ध्यानाकर्षण

यस्तै राजदूत होङले कम्युनिष्ट पार्टीको नेतृत्वमा दुई तिहाइको बलियो सरकार बनेसँगै नेपाल स्थायित्व र विकासको मार्गमा अघि बढेको भन्दै खुसी व्यक्त गरेकी छन् । राजदूत होङले चिनियाँ कम्पनीका लगानीमा निर्माणधीन विकास आयोजनाका काममा सहजीकरण गरिदिन सरकारको ध्यानाकर्षण गराइन् । मन्त्री बस्नेतले वन मन्त्रालयको जिम्मेवारी सम्हालेपछि रुख कटानका कारण आयोजनाका काममा हुने गरेका ढिलाई अन्त्य भएकामा उनले खुसी व्यक्त गरिन् ।

याे पनि पढ्नुस  वनलाई आर्थिक समृद्धिको आधार बनाउँदैछौंः वनमन्त्री बस्नेत

‘मेरो दुई वर्षको कार्यकालमा मैले नेपालमा तीनैतहको निर्वाचन र कम्युनिष्ट पार्टीको नेतृत्वमा दुई तिहाइको सरकार गठन भएको जस्ता घटनाक्रमलाई नजिकबाट निकाल्ने अवसर पाएँ’, राजदूत होङले भनिन्, ‘नेपाल स्थायित्व र विकासको मार्गमा अघि बढेको छ । यो नेपालका लागि ऐतिहासिक अवसर हो ।’ प्रधानमन्त्री केपी ओलीको चीन भ्रमणका क्रममा भएका सहमतिहरुको कार्यान्वयन सुरु भएको पनि राजदूत होङले बताइन् । राजदूत होङ दुई वर्षे कार्यकाल पूरा गरी यसै महिना चीन फर्कंदै छिन् ।

 

कमेन्ट गर्नुहोस्