Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

जोशी हाइड्रो पावरको साधारण शेयर बिक्री हुने

काठमाडौँ, मङ्सिर ७ ।

जोशी हाइड्रोपावर कम्पनीले रु १४ करोड ४८ लाख ४६ हजार बराबरको साधारण शेयर (आइपिओ) बिक्री गर्ने भएको छ ।

कम्पनीले यही मङ्सिर १६ गतेदेखि साधारण शेयर बिक्रीको तयारी गरेको हो । कम्पनीको शेयर छिटोमा मङ्सिर १९ गतेसम्म र ढिलोमा आगामी पुस १६ गतेसम्म रहेको छ । नेपाल धितोपत्र बोर्डले सो कम्पनीलाई गत कात्तिक १८ गते साधारण शेयर बिक्रीका लागि अनुमति प्रदान गरेको हो । कम्पनीको शेयर बिक्री प्रबन्धकमा सिद्धार्थ क्यापिटल लिमिटेड रहेको छ ।

आयोजना प्रभावित क्षेत्रका लागि कम्पनीले तीन लाख ७१ हजार ४०० कित्ता अर्थात् रु तीन करोड ७१ लाख ४० हजार बराबरको शेयर छुट्याएको थियो । त्यसमा प्रति शेयर रु एक सय अंकित दरको एक लाख २९ हजार ३९० कित्तामात्रै आवेदन परेको थियो ।

स्थानीयबासीले आवेदन नगरेको शेयर समेत आम सर्वसाधारणलाई बिक्री गरिनेछ । कम्पनीले इलाममा तीन मेगावाट क्षमताको माथिल्लो पिलुवा एक जलविद्युत् आयोजना सञ्चालनमा ल्याएको छ ।

आयोजनाको कूल लागत रु ५५ करोड ३५ लाख रहेको छ । यस आधारमा प्रतिमेगावाट लागत रु १८ करोड ४५ लाख रहेको छ ।

आयोजनाले विद्युत विकास विभागबाट २०७० साल जेठ १२ गते विद्युत उत्पादन अनुमति प्राप्त गरेको थियो । त्यस आधारमा सो आयोजनाको स्वामित्व ३१ वर्ष कम्पनीको नाममा रहने छ ।

आयोजनाको सर्वसाधारणमा लगानी फिर्ता हुने अवधि ११ वर्ष रहेको छ । आर्थिक अवस्थाको विश्लेषण गर्ने इक्रा नेपालका अनुसार कम्पनीको अवस्था कमजोर रहेको छ । रासस

कमेन्ट गर्नुहोस्

%d bloggers like this: