Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

औषधि उद्योगको उत्पादन न्यून

चितवन, मङ्सिर ९ ।

नेपालका औषधि उद्योगले क्षमताअनुसार उत्पादन गर्न सकेका छैनन् ।

मागको ७० प्रतिशत नेपाली उत्पादनले धान्न सक्ने भए पनि ४१ प्रतिशत मात्रै उत्पादन हुँदै आएको व्यवसायीले बताएका छन् । नेपाल औषधि उत्पादक सङ्घका केन्द्रीय अध्यक्ष दीपकप्रसाद दाहालले यहीँ उत्पादन हुने औषधि पनि प्रतिस्पर्धाका नाममा आयात गर्दा क्षमताअनुसार नेपाली उद्योगले उत्पादन गर्न नसकेको बताए ।

भारतले त्यहाँका औषधि उद्योगलाई विभिन्न ३५ वटा शीर्षकमा अनुदान दिने भए पनि नेपालमा त्यो व्यवस्था छैन ।

जसका कारण भारतमा उत्पादित औषधि सस्तो हुने गर्दछ । दाहालले विश्वका अधिकांश मुलुकले आफ्नो देशमा उत्पादन हुने औषधिको कच्चा पदार्थ मात्रै विदेशबाट आयात गर्ने भए पनि नेपालमा त्यसो हुन नसक्दा क्षमताअनुसार उत्पादन गर्न नसकिएको बताए ।

नेपालमा हाल ५३ औषधि उद्योग सञ्चालनमा छन् । पन्ध्र उद्योग सञ्चालनको तयारीमा छन् । ती उद्योगमा रु २५ अर्बभन्दा बढी लगानी भएको सङ्घले जनाएको छ । नेपाली उत्पादनले ४१ प्रतिशत धानेको छ भने ४९ प्रतिशत भारतीय र १० प्रतिशत अन्य विदेशी मुलुकबाट औषधि आयात हुँदै आएको छ ।

गत आर्थिक वर्षमा मात्रै रु २५ अर्ब ८१ करोडको औषधि आयात भएको उनले जानकारी दिए । यहाँका उद्योगले रु १८ अर्ब २५ करोडको औषधि उत्पादन गरेका थिए । भारतबाट मात्रै रु २१ अर्ब ४२ करोडको औषधि आयात भएको बताइएको छ । आव २०७२-७३ मा ४५ प्रतिशत हिस्सा नेपाली औषधिले धानेको भए पनि गत आर्थिक वर्षमा चार प्रतिशतले कमी आएको छ ।

यहाँका उद्योगी कच्चा पदार्थमा समेत भारतमा निर्भर छन् । वर्षेनी रु ६ अर्ब हाराहारीको कच्चा पदार्थ भारतबाट आउने गर्दछ । दाहालले भारतले पनि ८० प्रतिशतभन्दा बढी कच्चा पदार्थ चीनबाट आयात गर्ने गरेको जानकारी दिए । ठूलो मात्रामा ल्याउनुपर्ने भएकाले नेपालले सोझै चीनबाट कच्चा पदार्थ आयात गर्न नसकेको उनको भनाइ छ । रासस

कमेन्ट गर्नुहोस्

%d bloggers like this: