Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

जाखोर तालको जलकुम्भी हटाउन सुरु

धनगढी, मंसिर ९ ।

धनगढी उपमहानगरपालिका ७ स्थित जाखोर तालमा फैलिएको जलकुम्भी शनिबारबाट हटाउन सुरु गरिएको छ ।

धनगढी उपमहानगरपालिकाको अगुवाईमा प्रशासन, नेपाली सेना, जनपद प्रहरी र सशस्त्र प्रहरीहरु तालबाट जलकुम्भी हटाउन जुटेका छन् । जलकुम्भीले ताल कुरुप बन्दै गएको थियो ।

नगर प्रमुख नृपबहादुर वडले धनगढी उपमहानगरपालिकाभित्र रहेको मुख्य पर्यटकीय स्थलको सुन्दरता गुम्न थालेपछि सरसफाई अभियान थालिएको बताए । उनले भने, सफा गरेर तालमा डुंगा संचालनमा ल्याईने छ । कैलालीका प्रमुख जिल्ला अधिकारी बाबुराम श्रेष्ठले तालमा फैलिएको जलकुम्भी हटाउन थोरै ब्यक्तिले सम्भव नहुने भएपछि नेपाली सेना, जनपद प्रहरी र सशस्त्र प्रहरीसँग समन्वय गरिएको बताए । उनले एकैदिनमा पनि तालको जलकुम्भी हटाउन नसकिने भएकाले हरेक शनिबार सफा गर्ने कुरो भइरहेको बताए ।

धनगढी उपमहानगरपालिकाका उपप्रमुख सुशिला मिश्र भट्टले नगरका सार्वजनिक स्थलको सरसफाई गर्ने अभियान नै संचालन गरिएको बताईन । उनले सरसफाईसँगै जाखोर तालको गुरुयोजना अनुसार संरचना निर्माण गरिने पनि बताईन ।

धनगढी उपमहानगरपालिकाका सामाजिक विकास अधिकृत टंक बिष्टले जिल्लाका सामाजिक संघसंस्था, क्लव, खेलाडीहरुसँग पनि जलकुम्भी हाटाउनका लागि समन्वय गरिने बताए । जिल्ला वनस्पति कार्यालय कैलालीले माछा पालनमा रोक लगाएसँगै धनगढीको जाखोर तालमा फैलिएको जलकुम्भी हटाईने भएको छ ।

जाखोर ताल धनगढी उपमहानगरपालिकाको मुख्य पर्यटकीय स्थल हो । तत्कालिन धनगढी नगरपालिकाले २०५४ सालमा जिल्ला वनस्पति कार्यालयलाई स्वमित्व हस्तान्तर गरेको वडा नं ७ का अध्यक्ष सिताराम रानाले बताए । उनले भने– आफ्नो स्वामित्वमा रहेको ताललाई स्थानीय महिला समूहलाई भोगचलनका लागि दिएको भएपनि २०७३ मा बनस्पतीले समुहको भोगचलनमा रोक लगाएको थियो ।

स्थानीय महिला समुहले माछापालनका लागि ताल ठेक्कामा दिने समयमा तालको सरसफाई समेत गरिने हुदा जलकुम्भी थिएन वडा अध्यक्ष रानाले भने, ताल उपभोग गर्नमा रोक लगाएसँगै जलकुम्भी भरिएको छ । ताल झण्डै १२ हेक्टर रहेको छ ।

कमेन्ट गर्नुहोस्

%d bloggers like this: