विप्लवसँग छिट्टै एकता गर्ने मोहन वैद्यको घोषणा

तुलसीपुर, नेपाल कम्युनिस्ट पार्टी (क्रान्तिकारी माओवादी)का महासचिव मोहन बैद्य ‘किरण’ले नेत्रविक्रम चन्द विप्लव नेतृत्वको कम्युनिष्ट पार्टीसँग एकता गर्ने घोषणा गरेका छन् ।

दाङको तुलसीपुरमा भएको साक्षात्कार कार्यक्रममा बोल्दै बैद्यले नेपालमा सच्चा कम्युनिष्ट पार्टी आवश्यक भएकोले त्यसको निर्माणका लागि प्रयास गरिरहेको बताए ।

अहिले वैचारिकरुपमा माओलाई स्वीकार्ने समूहबीच छलफल चलिरहेको उनको भनाई थियो । विप्लव, गोपाल किराँती, मोहनविक्रम लगायत नेतृत्वका कम्युनिष्ट पार्टीसँग छलफल भइरहेकोले छिटै निष्कर्षमा पुगिने उनले जानकारी दिए ।

‘कुराकानी भइरहेको छ, टुट्न केही सजिलो भए पनि एकता गर्न केही कठिनाइ हुँदो रहेछ,’ उनले भने, ‘तर एकपटक सच्चा कम्युनिस्टहरु एक हुन्छौँ भनेर लागेका छौँ ।’

पूर्वएमाले र माओवादी केन्द्रको एकता सत्ताका लागि मात्रै भएको उनको आरोप थियो । बैद्यले यो एकता सत्ताका लागि मात्रै भएकाले लामो समय नटिक्ने पनि ठोकुवा गरे ।

‘यो एकता सत्ताका लागि मात्रै होे, कम्युनिस्ट एकता होइन,’ उनले भने ‘ लामो समय टिक्दैन ।’ सैद्धान्तिक रुपमा एकता नभइ चुनाव जित्नलाई मात्रै गरिएको उनको भनाइ छ ।

सरकारले नौ महिनासम्म पनि कुनै पनि उदाहरणीय काम गर्न नसकेको भन्दै बैद्यले भारतले नेपालको सीमा मिच्दा पनि सरकारले केही पहल नथालेको गुनासो गरे ।दुईतिहाइको बलियो सरकार निर्माण हुँदा पनि नौ महिनासम्म केही काम गर्न नसक्नु लाजमर्दो भएको उनको धारणा छ ।

कमेन्ट गर्नुहोस्